Abbonati subito per rimanere sempre aggiornato sulle ultime notizie
Furlan

Il Covid 19 nol ferme Suns Europe

Il calendari al è siôr di events fintremai par dut il mês che al ven in diviers comun furlans.

Un mês di events e sîs comuns cjapâts dentri. A son chescj i numars de seste edizion dal festival des arts in lenghe minorizade, Suns Europe – inmaneât de cooperative Informazione Friulana cu la poie finanziarie de Regjon Friûl-V. J. e de Agjenzie Regjonâl pe Lenghe Furlane (ARLeF) -. Fuarte de sô dimension ideâl (‘Dirit ae lenghe, dirit ae diversitât’) la kermesse e torne, dopo de emergjence Covid-19, cuntun program siôr e une schirie di novitâts, presentadis vuê in ocasion de conference stampe te sede de Regjon Friûl-V.J., a Udin, dulà che a àn partecipât Barbara Zilli, assessore regjonâl aes Financis; Fabrizio Cigolot, assessôr ae culture dal Comun di Udin; Eros Cisilino, president de ARLeF – Agjenzie Regjonâl pe Lenghe Furlane; Carlo Puppo, president de cooperative Informazione Friulana. L’obietîf di Suns Europe al è clâr (“Promovi lis produzions artistichis contemporaniis tes lenghis minorizadis europeanis cul fin di sostignî la costruzion di une Europe diferente, unide te diversitât, fondade sui dirits, sul pluralisim, sul rispiet e su la colaborazion”) ma chest an al è inevitabil cualchi cambiament impuartant te formule dal Festival. Cambiaments che no gjavaran nuie però ae atmosfere uniche di Suns Europe, ma che a permetaran ae organizazion di rispietâ lis normis par limitâ la difusion dal Covid-19. A cambiin, ven a stâi, lis datis: si tache ai 22 di Avost e si va indevant par dibot un mês, fin ai 19 di Setembar.

I assessôrs Zilli e Cigolot a àn laudât la iniziative che, cundut dal moment cetant ingredeât, e va indenant ancje chest an. Cun di plui, a àn marcât la impuartance di lâ indenant intal trasmeti, intal insegnâ e intal slargjâ l’ûs de lenghe furlane e, plui in gjenerâl, di dutis lis lenghis minorizadis, ancje par mieç di manifestazions tant che Suns Europe. «Chest an rinovâ l’apontament cun Suns Europe, e fâlu dal vîf, ancje se cuntune modalitât divierse dal solit, – al dîs il president de ARLeF, Eros Cisilino – al à un significât une vore impuartant. Al ribat il valôr de culture tant che moment di incuintri e di confront, al evidenzie la cjarie straordenarie di energjie e di vitalitât proprie des espressions artistichis contemporaniis di dutis lis lenghis minoritariis. Il Festival al è cressût une vore dal 2009, cuant che tant che ARLeF o sin stâts i prins a crodi te manifestazion. Se vuê al è deventât il festival european plui impuartant dal so gjenar al è parcè che al à savût imponisi pe cualitât e la ricjece de propueste, continuant a esplorâ, in particolâr, i univiers musicâi dai artiscj, tancj di lôr une vore zovins, che a fasin de lenghe minoritarie il lôr strument di espression identitarie».

LA GNOVE EDIZION – Al è stât Carli Pup che, dopo di vê manifestât il so agrât a ducj i membris de organizazion e massime al diretôr artistic Leo Virgili e al curadôr di Suns Friûl Pauli Cantarut, al è jentrât di plui intai detais dal program, e a sclarî: «La pandemie nus à obleât puartâle cimade, cun dut achel, cheste version estive dal festival nus da la oportunitât di esplorâ e di proponi al nestri public formulis gnovis e stimolantis – al à ricuardât Puppo -. Chest an, par esempli, o sarìn plui presints sul teritori proponint lûcs sugjestîfs e, in cualchi câs, plens di significâts simbolics tant che il Cjistiel di Udin, la place dal Comun a Murùs o il cuel di S. Martin a Dartigne. Dongje de sezion musicâl cetant siore, la edizion 2020 e darà la pussibilitât di confrontâsi cun ospits di alt nivel – di Núria Cadenes a Angelo Floramo, di Joseba Asiron a Sergio Berardo – che nus compagnaran dilunc di percors inmagants che a traviersin secui e tieris diviersis proponint elements impuartants par capî il vuê e insumiâsi dal doman».

IL CONCIERTON DI SUNS EUROPE IN CJISTIEL – Intune corse cuintri il timp i organizadôrs a àn, di fat, decidût di anticipâ l’event di cualchi mês. In cheste maniere i grups a podaran esibîsi tal viert. I puescj a saran però limitâts, la jentrade chest an e sarà gratuite ma cun prenotazion obligatorie sul sît (https://www.sunseurope.com/fur/prenotazion/). La organizazion e à ancje decidût di rimandâ al 2021 la competizion di Suns Europe, ma sul palc di chel che il public al cognòs aromai tant che il “conciert finâl” si scoltaran simpri propuestis musicâls di cualitât alte, element essenziâl in assolût. O scoltarìn alore il Martina Iori Quartet (Ladinie), lis Adwaith (Gales), La Basu (Paîs Basc), Laura Giavon e Drumlando (Friûl), e Bujumannu & Jumbo from Train To Roots (Sardegne). Ducj a sunaran in Cjistiel, ai 30 di Avost a nûf di sere (21.00). Tal câs che al plovi il Festival si movarà al Teatri Palamostre e, magari cussì no, il numar di puescj al sarà ridusût in maniere drastiche, garantint la jentrade dome aes primis 200 personis che a àn prenotât. Al presentarà la serade, pal secont an di file, Doro Gjat! Cun di plui, come di tradizion, e je in program une direte radiofoniche de serade des 21.00 aes 23.00, par cure di Mauro Missana e di Paolo Cantarutti, di Radio Onde Furlane.

SUNS FRIÛL – Une altre grande novitât di cheste edizion 2020 al è Suns Friûl, vetrine dedicade aes gnovis produzions musicâls furlanis dal moment! L’apontament al è tal cûr di Udin. Sul palc di place Venerio, sabide ai 22 di Avost, a nûf di sere (21.00), a sunaran i Corte di Lunas cul lôr epic folk inmagant; i Brût & Madone, bandiere dal metal core furlan; Alvise Nodale, erêt de cjançon di autôr cjargnele; i Dissociative TV cuntun punk rock dut batarie e ghitare eletriche; e i Ostajki che a rivin de Slavie furlane e de alte valade dal Lusinç. Parons di cjase a saran Raffaele Serafini e Serena Fogolini, animadôrs de Ostarie leterarie in rêt ConteCurte, che a presentaran i ospits. Tal rispiet des regulis par fâi cuintri al Covid i puescj a saran limitâts. La jentrade e je sore nuie ma si à di prenotâ sul sît https://www.sunseurope.com/fur/prenotazion/. Suns Friûl al nas cun chê di cjapâ sù la ereditât dal storic Premi Friûl di Radio Onde Furlane, une farie che e à scuviert, promovût, produsût disinis di grups musicâi e autôrs che a àn savût rignuvî a fonts la musiche furlane de metât dai agns ‘90 a vuê. Mitili FLK, Lino Straulino, Arbe Garbe, Loris Vescovo, Carnicats e Doro Gjat, Luna e Un Quarto, Fabian Riz e DJ Tubet a son juste un pôcs dai artiscj che in gracie dal Premi Friûl e e de etichete Musiche Furlane Fuarte a àn dât un contribût impuartant ae musiche e, plui in gjenerâl, ae creativitât artistiche par furlan e, di chê strade, a dute culture furlane, massime framieç dai plui zovins. Dopo di vêsi centrade tai ultins agns soredut su la organizazion di Suns Europe, Informazione Friulana e à decidût di recuperâ il spirt dal Premi Friûl metintlu dentri ta cheste suaze gnove. Cemût che a spieghin i organizadôrs: «Propite il rivoc che il festival european al à vût, nus a stiçâts a cjapâ dentri un event che al fasès di vitrine pes miôr produzions musicâls furlanis dal dì di vuê e di risultive di propuestis creativis par Suns Europe».

CINE – Ma Suns Europe, si sa, nol è dome musiche, ma ancje cine e leterature.

Chest an e je in program la pelicule galiziane “O que arde” che e sarà proietade, in graciis de colaborazion cul CEC – Centri Espressions Cinematografichis, sabide ai 29 di Avost aes 21.15 alì dai zardins “Loris Fortuna” (se al ves di plovi: cine Visionario). Realizât tal 2019 in graciis di une coproduzion internazionâl, “O que arde” (Ce che al bruse) al è un film dramatic dal regjist Oliver Laxe, zirât dut par galizian e sottitulât par talian pe ocasion. Tal 2019 il film al à vinçût il premi de critiche te sezion “Un Certain Regard” dal festival di Cannes, e il premi “Astor d’oro” tant che miôr film al festival internazionâl Mar del Plata, la plui impuartante rassegne cinematografiche dal Sud Americhe. Chest an “O que arde” al è stât premiât ancje intai Premis Gaudí e Goya e in altris festival ator pal mont. Al è deventât il film in galizian plui viodût tai cines.

LETERATURE – Simpri sabide ai 29 di Avost, aes 18.15, alì de Librarie Friuli di Udin, e je in program la prime presentazion tal stât talian di “Guillem” de gjornaliste Núria Cadenes che e fevelarà cun Carlo Puppo. Il romanç al conte la storie di Guillem Agulló i Salvador, sassinât di un grup di neofassiscj ai 11 di Avrîl dal 1993 a Montanejos (Paîs Valenzian). Al jere un atlete, un antifassist, un indipendentist. Al veve dome 18 agns. La sô e je une storie che e à segnade une gjenerazion interie e che e à rindût Guillem Agulló un simbul di libertât.

Il secont apontament leterari di Suns Europe al è invezit in program lunis ai 31 di Avost aes 20.30, in place a Murùs (se al ves di plovi: Auditorium “Riedo Puppo”). Il storic basc Joseba Asiron e l’inteletuâl furlan Angelo Floramo a daran vite a “Conquista! Storiis resistentis tra Navare e Friûl”, une serade là che si confrontaran i 600 agns de colade dal stât patriarchin di Aquilee cun chei de colade dal ream de Navare dal 1512. Lis dôs vicendis no dan dome la pussibilitât di resonâ su events storics che a presentin cetancj ponts in comun, ma ancje su lis consecuencis che a àn vût su lis comunitâts coinvoltis, su cemût che la storiografie “uficiâl” e à cirût di gjavâi fuarce ae nature stesse di chês vicendis e su la riscuvierte di simbui, fats e protagoniscj di chel moment storic par tornâ a dismovi lis cussiencis. Un percors che al travierse la storie e la memorie par fevelâ de nestre atualitât.

SUNS EUROPE AL VA INDEVANT IN SETEMBAR – Par chel che al inten i apontaments di Setembar si començarà ai 5 a Lavarian cul conciert di Joana Gomila (Paîs Catalans) che la dì dopo e sarà a Dartigne. Ai 12 di Setembar ducj a Puçui par un altri conciert, chel di Paxkal Irigoyen (Paîs Basc) che po ai 13 al sunarà a Romans dal Lusinç. Suns Europe al sierarà ai 19 a Trave cuntun event a miezis jenfri leterature e musiche che al varà tant che protagoniscj Angelo Floramoe Sergio Berardo (Ocitanie).

IL FESTIVAL SUNS EUROPE – Inmaneât de cooperative Informazione Friulana cu la poie finanziarie de Regjon autonome Friûl – Vignesie Julie e de ARLeF, Agjenzie Regjonâl pe Lenghe Furlane, e cul jutori dal Comun di Udin e dal Etxepare Euskal Institutua (Paîs Basc) – fin dal principi si à davuelt sot dal patrocini dal Consei de Europe e dal NPLD, Network to Promote Linguistic Diversity, la rêt europeane pe promozion de diversitât linguistiche. Cun di plui al gjolt de colaborazion di cetancj sogjets publics e privâts tant che i Comuns di Dartigne, Mortean, Murùs, Puçui, il CEC, Centri Espressions Cinematografichis, la Societât Filarmoniche di Puçui, e lis associazions Amici del teatro e Cocula. Suns Europe al fâs de citât di Udin une crosere di culturis, lenghis e artiscj, al stice miscliçaments e confronts, al met in evidence une produzion artistiche di grant valôr.

Dut il program e lis informazions si cjatin su www.sunseurope.com e te pagjine Facebook | Instagram |

Articoli correlati