Se si considere come prin Concili l’incuintri dai apuestui Pieri e Pauli a Jerusalem par risolvi cualchi cuestion (At 15, 1-9), chel di Nicea (325) al è il secont concili de Glesie. Concili convocât dal imperadôr Costantin a pôcs agns dal edit di Milan (313) che al à dade libertât di cult ai cristians, dopo secui di persecuzions.
Di chest Concili che al tratave problemis teologjics impuartants, che si stavin dibatint su la figure di Jesù Crist, la sô umanitât e divinitât, e je nassude la prime forme di ‘Credo’. Une formule che, po, e sarès stade completade tal 381 tal Concili di Costantinopoli. Al è il Credo Nicen-Costantinopolitan che o disìn ore presint intes Messis.
Di chest si capìs l’impuartance e l’atualitât, ancje al dì di vuê, di chel Concili che al merte cognossût e capît miôr.
Par chest ancje Glesie Furlane e propon un incuintri a Vençon domenie 16 di Novembar a lis 15,30 tal palaç Orgnani Martina.
Titul de conference al è “Nicea e la fine del Cristianesimo delle origini”. Relatôr al sarà il prof. Gabriele Pelizzari docent di Leteradure cristiane antighe a la Universitât Statâl di Milan.
1700 agns dal Concili di Nicea, incuintri di Glesie Furlane a Vençon
