Il volumut cui bogns auspicis pal 2024, rivât ae edizion numar 105 e metût adun di Dani Pagnucco, al compagnarà i letôrs cun contis, poesiis e rubrichis scritis tes diviersis varietâts dal furlan. Tra i nons cognossûts presints tal Strolic o citìn Gianni Colledani, Angelo Floramo, Laurin Nardin, Benvenuto Castellarin, Antonino Danelutto, Carlo Zanini, Diego Lavaroni; tra i autôrs cjargnei: Iside Del Fabbro, Alessio Screm e Lucina Dorigo. I dissens a son di Annalisa Gasparotto e Oriana Cocetta.
Ma la novitât di cheste edizion e je la rubriche “Linda Cjargnela”, che e presente i contribûts, tes lôr variants locâls, di dodis autôrs de Cjargne: Elia Ferigo, Elsa Martin, Giacomo Bonanni, Lucia Protto, Manuela Quaglia, Paolo Roseano, Velia Plozner, Tita De Stales, Bruno Mongiat, Pieri Pinçan, Novella Del Fabbro e Celestino Vezzi.
Il Strolic 2024 aI proferìs mês par mês une biele schirie di flôrs che a cressin inte nestre regjon: cutuardis speciis fotografadis di Serena Chiapolino, cjargnele di Çurçuvint, e descritis di Alberto Candolini, sieltis fra lis cirche trê mil e cinccent che o vin sul nestri teritori: no dome la montagne ma ancje lis risultivis, i magrêts de Celine-Midune, il Cjars. Si à sielt prin di dut lis plantis raris e chês che a vivin nome te nestre regjon, po i diviers ambients di partignince, in mût di spaziâ il plui pussibil ta cheste biodiversitât maraveose, par finî, si à cirût la bielece des fotografiis, parie cun chê des plantis. Lis didascaliis a presentin il non sientific latin, il non talian e il non furlan, cuant che si à rivât a cjatâlu.
Il Strolic al rive a Tumieç dulà che, in graciis de colaborazion e de ospitalitât de Biblioteche Civiche, al sarà presentât ai 18 di Zenâr dal 2024 aes 5.30 dopomisdìdi Dani Pagnucco e Celestino Vezzi dutune cun cualchi autôr cjargnel che al darà vôs ai siei scrits.
