La Societât Filologjiche Furlane e à dât fûr l’avîs di concors de XXII edizion dal Premi Ciceri, intitulât ai studiôs de culture tradizionâl dal Friûl Luigi Ciceri e Andreina Nicoloso Ciceri.
Il concors, che al assegne un premi a contribûts sientifics che a rivuardin aspiets de culture e dal teritori dal Friûl, al è dât di una sezion “scrits” e una borse di ricercje.
Rivuart la sezion dai “scrits” i lavôrs che a concorin a àn di jessi inedits, mai premiâts in altris concors e a àn di vê caratar sientific, no leterari, no memorialistic o di chê fate. A àn di riferîsi a aspiets e percors di valorizazion de culture e dal teritori dal Friûl tant che: storie, gjeografie, architeture rurâl, paisaç, turisim, economie pal disvilup dal teritori, musiche furlane, tradizions popolârs e linguistiche furlane. A puedin rivuardâ ancje la storie, lis ativitâts e i colaboradôrs de Societât Filologjiche Furlane, prudelade dai benemerits Andreina e Luigi Ciceri cun convinzion e cun passion.
La borse-premi e je di € 5.000: la Jurie e pues spartî la cifre tra plui premiâts, o ben e pues decidi di no assegnâ il premi. I lavôrs a àn di jessi presentâts dentri dai 31 di Lui dal 2025.
Inte suaze dal Premi la Societât Filologjiche Furlane e istituìs ancje une borse di ricercje a pro di studiôs e ricercjadôrs, ents, associazions e istituzions che a fasedin une ricercje su un di chescj argoments: etnografie, studi des tradizions popolârs e de musiche furlane, culture materiâl.
Il valôr de borse di ricercje al è di € 5.000. Par partecipâ si à di fâ domande dentri dai 31 di Zenâr dal 2025 e la ativitât di ricercje e varà par fuarce di sierâsi dentri dai 30 di Setembar simpri dal an cu ven.
Il bant par intîr e i modei par fâ domande a son a disposizion sul sît www.filologicafriulana.it. Par informazions clamâ o scrivi ae biblioteche de Societât Filologjiche Furlane (tel. 0432 501598 int. 2, biblioteca@filologicafriulana.it).
