E je daûr tacâ une gnove stagjon di “Maman!” e e sarà pardabon speciâl. La trasmission televisive che e acompagne i fruts ae scuvierte de lenghe furlane e dal Friûl e distude 10 cjandelutis! E sarà une stagjon plene di ligrie e di divertiment. La date di tignî iniments e je chê di vinars ai 10 di Otubar aes 18.30, cuant che Daria Miani, cul so inseparabil tui Vigji, e Desiree Chiappo Debegnach, la simpatiche “vicine di cjase”, a tornaran su Telefriuli pe gjonde di cetancj fruts. Fin al prossim mês di Jugn, Maman! ur fasarà compagnie ogni vinars, simpri aes 18.30 e, in repliche, la domenie aes 7 e aes 13.
La trasmission televisive e je une coproduzion tra la ARLeF – Agjenzie regjonâl pe lenghe furlane e Telefriuli. Al è un program che, cul divertiment, la narazion e il zûc al espon i plui piçui al plurilinguisim e ai tancj vantaçs cognitîfs e comunicatîfs che si àn cul doprâ plui lenghis fin di piçui.
Cun gjonde e ligrie, Daria e Desiree a regalaran ai piçui telespetatôrs aventuris speciâls, moments di zûc e tant intratigniment cun musiche, cartons animâts, e cu la leture di contis origjinâls e de tradizion. Il divertiment educatîf al è garantît di rubrichis di sucès tant che “Fasìn un zûc”, che e cjape dentri i fruts cun cuesîts e induvinei e “La cusine Bete”, che e à come protagoniste la estrose “cusine” di Daria Miani (ven a stâi Daria stesse). Je e proponarà piçui esperiments, mini-laboratoris cun lavoruts simpatics e e contarà ancje tantis curiositâts sul Friûl, ma ancje su altris Paîs dal mont, su lis lôr culturis e lis lôr lenghis.
Tra lis novitâts de decime stagjon al è in particolâr un gnûf carton animât che al plasarà une vore ai fruts plui piçui: “Spiçut il riçut”. Al conte lis aventuris e lis emozions di un riçut une vore dolç e dai siei amîs, puartant i fruts tal mont des besteutis dal bosc.
La trasmission e je metude adun di un grup di professioniscj di alt nivel: il responsabil de produzion al è William Cisilino, la regjie e je di Martina Beraldo, il program al è scrit di Francesca Battistutta, Daria Miani, Sabina Pituello e Eva Zucchiatti e la consulence linguistiche e je curade dal Sportel Regjonâl pe Lenghe Furlane. Lis musichis origjinâls a son di Flaviano Miani e Daria Miani e la animazion de sigle e je di Tommaso Ravo. Al progjet a colaborin Veronica De Giorgio, Giulia Della Mora e Gaia Riabiz.
Dutis lis pontadis de stagjon numar 10 a saran disponibilis ancje te tv on demand di Telefriuli, tal canâl YouTube e tal sît de ARLeF, là che si puedin za cjalâ lis 260 pontadis des stagjons passadis. Cun di plui, tal sît i fruts a podaran cjatâ tancj altris contignûts simpatics su Maman!
