Di plui di mieç secul i fedei de Glesie furlane si dan adun a Aquilee, pe fieste dai Sants Patrons Ermacure e Fortunât, in ocasion dal Avôt dal Friûl. L’apontament pe edizion 2026 al è fissât par domenie ai 19 di Lui, a lis 18.30 sore sere, te Basiliche di Aquilee.
La celebrazion e sarà dute in lenghe furlane, tal spirt di chê libertât che si spere di podê vivi in maniere plene ancje in glesie, scomençant a doprâ il Messâl furlan, che al è ancjemò in penose spiete de aprovazion necessarie. A presiedi la messe al sarà bons. Luciano Nobile, intant che i cjants a saran compagnâts dal coro Rôsas di Mont di Guart.
La iniziative e je promovude de Glesie Furlane APS, cu la colaborazion de La Patrie dal Friûl APS, Associazion Colonos APS, Societât Sientifiche e Tecnologjiche APS e Istitût Ladin Furlan “Pre Checo Placerean” APS.
