On line i gnûfs videos musicâi pai fruts promovûts de ARLeF

“Il Ream dai Fruts”, “Sacheburache”, “Vosutis te sachete”. A son chescj i trê gnûfs progjets destinâts ai plui piçui e promovûts de ARLeF - Agjenzie Regjonâl pe Lenghe Furlane. Vincjesiet videos in dut, caraterizâts di un unic fîl ros: la musiche, par scoltâ, balâ e cjantâ par furlan. Destinataris i fruts tra i 3 e i 10 agns. I filmâts si puedin cjatâ sul canâl YouTube de Agjenzie, inte sezion pai fruts dal sît arlef.it e in curt ancje tal gnûf sît dedicât ai plui piçui www.ghiti.it. Tal câs di “Il Ream dai Fruts”, a son stâts realizâts ancje i dvd che a saran inviâts aes scuelis de infanzie e a chês primariis, a supuart dal insegnament de lenghe furlane.

«Vuê o presentìn trê gnûfs progjets pensâts di pueste pai fruts» al à marcât il president de ARLeF, Eros Cisilino, in ocasion de presentazion dai progjets, dulà che àn partecipât ancje l’assessôr regjonâl aes lenghis minoritariis, Pierpaolo Roberti, Alberto Zeppieri par Numar Un, Elisabetta Ursella par Belka Media, e Martina Franceschina pe associazion Beltram di Aquilee.

“Il Ream dai Fruts” (Numar Un), al è la version in lenghe furlane dal famôs program argjentin “El reino infantil”, cu la traduzion des cjançons e cul adatament dai personaçs al contest furlan. “Sacheburache” (Belka Media) al à “pescjât” invezit tra lis nainis de tradizion orâl, proponintlis ancje intune version rap origjinâl. “Vosutis te sachete” (Associazion musicâl “Beltram di Aquilee”), al presente cjançons ineditis in marilenghe, modernis e apassionantis, cjantadis dai fruts stes.  

«I videos a rapresentin un strument di utilitât sigure – al à comentât Roberti - pe difusion dal furlan sedi intes fameis che inte scuele».