Regione
stampa

E nas la Patrie

Ai 3 di avrîl dal 1077 e nassè la Patrie dal Friûl.

E nas la Patrie

Ai 3 di avrîl dal 1077 e nassè la Patrie dal Friûl. Il diplome al fo datât a Pavie e firmât dal imperadôr todesc Inri IV. Il destinatari al fo il patriarcje Sigeart che al deventà Duche dal Friûl e Princip dal Principât dal Friûl.

Nol è un câs che chest al sedi sucedût. Chei timps no jerin par nuje di grande pâs, si ben di grandis balfueriis. Une di chês, grandonone, e jere chê che viodeve il pape Gregori VII cuintri l’imperadôr todesc Inri IV. L’imperadôr al veve diclarât il pape tanche usurpadôr e lu veve fat deponi. Par cuintri il pape al veve scomunicât Inri IV diclarant i siei sotans libars de ubidience al imperadôr, intrigant no pôc il rapuart jenfri imperadôr e princips giarmanics. Tocjave cjatâ un mût di tornâ a meti d’acuardi i doi.

I protagonists di cheste conciliazion a forin doi. Matilde di Canosse e il patriarcje di Aquilee Sigeart. Matilde e jere la “magna comitissa” di un grant teritori ch’al cjapave drenti Lombardie, Emilie Romagne e Toscane. Contesse, duchesse e marchese, Matilde e fo une des personalitâts politichis plui interessantis de Ete di Mieç talian. E jere ancje parinte dal imperadôr. Ma jere soredut grande amie dal pape. Il centri dal so “imperi” e jere Canossa, un cjscjel sul Apenin emilian. O miôr dute une serie di cjascjei che si paravin un cun l’âtri e chel di Canosse chel plui inacessibil. Cumò di chel cjascjel a restin dome cualchi rudinaç ma jenfri a chei si po visitâ ancje un rest de glesie dulà che si cjatarin insiemit il pape e Inri IV a la presince de parone di cjase, Matilde di Canossa, e dal Patriarcje di Aquilee Sigeart. Sigeart al jere stât cancelîr imperiâl e al jere un bon ami dal imperadôr ma ancje in buinis cul pape. Ancje o forsit soredut in gracie di lui i doi, il pape e l’imperadôr, a tornarin a justâsi. Ma il patriarcje al fasè ancje di plui, al sigurà al imperadôr il so viaç indaûr in Gjarmanie compagnanlu, daspò vê passade la Pasche insiemit in Aquilee, fintremai a Regensburg dulà che ai 11 di jugn al concedè a la glesie di Aquilee ancje la marche dal Cragn e la contee de Istrie. Sigeart al murì dut a bot a Ulme dulà che al veve difindût l’imperadôr denant dai princips e dal popul.

Cun chel diplome e cun chês consessions dal imperadôr il patriarcje al deventave so vassâl e a cjâf di un Friûl tornât adun cul so teritori e che al cuistve une sô autonomie politiche rispiet a la marche veronese e al ducât carinzian. In tune peraule al nasseve il “principatus Italiae et imperii”, politic e gleseastic, ven a stâj la Patrie o come che si diseve ancje il Forum Julii, il Friûl autonim che par scuasit cuatri secui al fo “une des formis plui maduris di organizazion politiche unitarie e incentrade nassudis in Europe te Etât di Mieç” (Gc. Menis).

Che in Friûl si vedi di ricuardâ cheste date e di onorâle e je la cjosse plui normâl. Purtrop tes nestris scuelis, e ancje te nestre universitât, no si studie la storie dal Friûl e dal popul furlan a la barbe des leçs e dal bon sens. Par furtune di un pôcs di agns si à ripiade cheste ocasion par memoreâ la storie furlane e par onorâ la culture furlane che si suage benon jenfri lis miôr culturis europeanis. Il patriarcjât di Aquilee di in chê volte fintremai a vuê cundifat al cjapave drenti culturis, etniis e lenghis difarentis e propit chês che lu faserin e che a fasin ancje dal Friûl di vuê une des regjons plui europeanis. Achì cundifat a convivin di simpri popui latins, todescs e slâfs, lis culturis apont che a fasin e a cualfichin l’Europe.

Achì si sperimentà jenfri i prins se no il prin esperiment di partecipazion democratiche, il parlament furlan, che nol cjapave drenti dome nobij e gleseastics ma ancje lis comunitâts. Un parlament che al metè adun tal XIV secul chel monument dal dirit furlan che a son “Lis Costituzions de Patrie dal Friûl”.

Ma dut al scomençâ ta chê gleseute di cjascjel sul Apenin emilian che si po visitâ e che nô o vin vude la furtune di viodi cui nestris vôj.

Sicheduncje jessi furlans nol vûl dî dome jessi di chenti, ma soredut al vûl dî jessi a part di une grande storie, di une grande culture e di jessi braurôs di jessi a part di cheste straordenarie ereditât e di scugnî onorâle.

E nas la Patrie
  • Attualmente 0 su 5 Stelle.
  • 1
  • 2
  • 3
  • 4
  • 5
Votazione: 0/5 (0 somma dei voti)

Grazie per il tuo voto!

Hai già votato per questa pagina, puoi votarla solo una volta!

Il tuo voto è cambiato, grazie mille!

Log in o crea un account per votare questa pagina.

Non sei abilitato all'invio del commento.

Effettua il Login per poter inviare un commento