A son stâts consegnâts i prins atestâts di certificazion de cognossince de lenghe furlane. Ae cerimonie, te sede de ARLeF – Agjenzie regjonâl pe lenghe furlane, a àn partecipât il so president, Eros Cisilino; il diretôr de Agjenzie, William Cisilino, e Massimo Duca, president de comission di esam.
«Chescj a son i prins risultâts impuartants di un percors ambiziôs che o vin tacât cualchi an indaûr e che al jere pardabon spietât dal teritori: la certificazion linguistiche pal nivel B, ven a stâi il nivel che plui di chei altris si pee cul mont dal lavôr, cu la aministrazion publiche e cu la scuele. La certificazion e je un dai obietîfs principâi e essenziâi des leçs che a son ae fonde de promozion e de tutele de lenghe furlane. Par chest prin sucès o vin agrât ae Regjon Autonome Friûl-Vignesie Julie, cul grant lavôr dal Assessorât cun a cjâf Alessia Rosolen, e ae Universitât dal Friûl, cul retôr Roberto Pinton che, in prime persone, al à metût a disposizion dutis lis competencis plui altis dal nestri ateneu. Si scuen sigûr ringraciâ ancje i docents e i partecipants che a àn dimostrât une grande dedizion e il desideri di cognossi la nestre lenghe. Cun chest prin travuart, si salde un avignî che si posizione inte fasse alte des miôr politichis linguistichis in Europe», al à marcât Eros Cisilino, president de ARLeF, in ocasion de cerimonie di consegne dai atestâts di certificazion.
I dîs candidâts che a àn passât l’esam – che al è stât fat ai 27 di Novembar stâts inte Universitât dal Friûl – a àn frontât cuatri provis: prin di dut la comprension orâl, fate scoltant une regjistrazion e rispuindint a un test a rispueste multiple; po dopo e je stade la comprension scrite, cheste volte cun trê esercizis là che i candidâts a àn vût di completâ frasis cu la peraule juste o di meti adun elements; la tierce prove e je stade la produzion scrite, cuntun teme di 500 peraulis suntun argoment gjavât a sorte; par finî a àn sostignût un piçul colocui orâl cui certificadôrs. Passâ dutis lis provis ur à permetût di otignî la certificazion pal nivel B, chel “intermedi” daûr dal CCER, il cuadri comun european di riferiment pe cognossince des lenghis, scrite e fevelade, fat bon cuntune risoluzion dal Consei di Europe tal Novembar dal 2001, che al è ricognossût a nivel internazionâl pe valutazion des competencis e des capacitâts linguistichis.
I nivei pe lenghe furlane a son cuatri: A, elementâr; B che o vin za analizât; C1 avanzât; C2 paronance in situazions complessis.
