A son viertis lis iscrizions a la edizion 2025 dai Cors pratics di lenghe e culture furlane, inmaneâts de Societât Filologjiche Furlane (progjet finanziât de ARLeF – Agjenzie Regjonâl pe Lenghe Furlane). Lis lezions a trataran argoments di grafie, gramatiche e imprescj linguistics informatics.
Il cors di Udin – te sede de Societât Filologjiche in vie Manin 18 – al tacarà vinars ai 17 di Otubar a lis 5 dopomisdì, al sarà di nivel intermedi, risiervât duncje a cui che al à za frecuentât un Cors pratic di lenghe e culture furlane. Al larà indevant par 13 lezions. Il docent al sarà il dot. Flavio Vidoni.
A la fin dal cors al vignarà consegnât un certificât di frecuence a chei arlêfs che a varan partecipât a almancul il 70% des oris di lezion. Il certificât al è titul culturâl par jentrâ te Liste regjonâl dai insegnants cun competencis di lenghe furlane.
Il cors al è a gratis e viert a ducj i interessâts. Iscrizions ta chest link: https://forms.gle/i8ZTy3yk8kDFwKW28
Altris cors a son daûr a scomençâ in svariâts Comuns dal Friûl. Par informazions e iscrizions, cjalâ sul sît internet https://www.filologicafriulana.it/fur/cors-pratics-di-lenghe-furlane/ o ben clamâ l’Ufici Formazion de Societât Filologjiche (tel. 0432 501598 int. 3).
