Il Circul Culturâl La Dalbide di Çurçuvint, cuintre la retoriche das gueras, al vûl inmò une volte dâ vous as protagonistas dismenteadas: las feminas.
In ‘Storie Taciute’ trei feminas as contin la lôr guere, chê vivude su pa lôr piel.
La propueste teatrâl de La Dalbide, cul patrocini da Aministrazion Comunâl, a començarà as 20.30 di vinars 25 di lui 2025 ta cort da sietecentesche Cjase Morassi a Çurçuvint di Sôre. Entrade libare
Il spetacul
Il spetacul teatrâl al nas tai nostis paîs, da vous das nostas nônas e mâris, paîs di contadins dignitous di puaretât e relazions, mudâts in paîs di guere.
Tas cjasas son restâts dome feminas e fruts; las feminas as tegnin su cjase e paîs.
In scene cjantants e atoras as tegnin di vouli un baûl plen di ricuarts, di fats che no àn vût vous, roubas da platâ, ‘vergognas’, forsi.
Ta suage dal contâ e dai cjants, sielgiûts da tradizion popolâr furlane e proponûts a dôs vous, a si disvuluce la noste storie contade par mieç da cjaladure ràmpide e cence pêi su la lenghe di une pueme che a presente i fats cu la naturalece e l’irunie da sô giovine etât.
Di ce che al è sucedût ta campagne furlane sul cuarp das feminas dopo Cjaurêt àn scrit dome i oms e a nissun i ven indiment di domandâ la version feminine.
‘Storias Tasudas’ a vûl dâ vous a cui che nol à vût imprescj par fâlu: cun Flavia Valoppi, Chiara Grillo e Annalisa De Vittor, dramaturgjie e regjie Flavia Valoppi.
