Il mês di Mai, tai miei ricuarts di zovin, al jere di scussons e di rosaris, che ducj i doi si cjapavin in bondance: i prins, cence fâur mâl, si peavin par une gjambute cuntun spali, par fâju svoletâ nô come parons, i seconts come ocasion par jessî fûr la sere, e in cambi dal rosari, par cualchi tabaiade cu lis fantacinis dal borc, che dut câs ur plaseve ancje a lôr.
Ma no varès mai pensât che une serade di Mai e sarès stade la plui teribile de mê vite, cuant che sflamadis di muart a inceavin il cîl, cemût che mi disarà un gno amì di Glemone, di chê serade dai sîs di Mai dal ’76.
Chê lungje sacodade le vevi sintude ancje jo, a Udin, cuant che l’orcolat al veve inviade la sô danze macabre, denant dal soiâr de puarte dal gno apartament, stret cu la femine e il frutin in braç, in spiete che la scjale e finìs di tontonâ di ca e di là, par podê scjampâ in curtîl.
Dabàs, tal curtîl, ducj si cjalavin sturnîts, plens di domandis ma vueits di rispuestis, propit come il telefon dai miei che, tra une scossade e chê altre, o cirivi di clamâ. Jo e la femine si cjalarin tai voi e la sô voglade e fo un sburt: “Moviti, va sù”.
A Glemone o vevi i miei di famee, amîs ma ancje i aministradôrs comunâi che o jeri un di lôr, e che se al fos coventât, o varès vût di fâ la mê part. Mi pareve che il cîl di chê gnot al fos plui scûr di chel des altris gnots di Mai. La strade che o corevi e jere suturne e di lontan mi pareve di viodi il cîl a rossizâ.
A Magnan un condomini si jere pognet su se stes, come se intun lamp i fossin mancjadis lis fuarcis, e int dulintor che e someave preâ par che al tornàs a jevâsi sù.
Il pît al cjalcjave plui fuart sul pedâl, ancje lui bramôs come me di rivâ a Glemone il prin pussibil. No sai cemût che o rivai fin te place dal Fier, che plui sù lis stradis no davin acet aes machinis.
Tal caligo cidin che al taponave chê albe triste che e stave nassint, il voli al cirive la tor e l’orloi dal cjistiel, ma tal so puest al olmave dome un spiron, un spiçot fantasime, il macabri scarsanali, il trofeu de matetât dal orcul, che al veve volût scancelâ storie e memorie di Glemone. Lu cjalavi sturnît, e cemût che al sucêt in chei moments, di cuintri o viodevi il ricuart di un frut che al coreve in cjistiel par sentâsi sul canon de Prime vuere mondiâl, che de balconade al cjalave fin al fuart di Osôf e al someave tignî la vuardie a improbabii invasôrs; e dopo lis spassizadis man tes mans cu la morose, che i plasevin tant i zardins dal cjistiel.
Tal borc di Vile, dulà che a stavin i miei, la strade e jere plene di clapons e di rudinaçs, come se ancje lis animis des cjasis a fossin stadis sdrumadis dal orcolat. I miei ju cjatai tal ort di Bizi, pôc plui in là de lôr cjase, che a miezis e jere colade.
La mê presince ur lassà un pocje di sperance; un abraç al disè plui di tantis peraulis, e daspò o scjampai vie pe stazion, che mi jere stât dit di cjatâsi te caserme Goi, chê dai alpins, che e jere stade sdrumade. Tal grant curtîl, militârs, lis primis autoritâts, un grant vosarili e un cori di ca e di là, ma ancje lis domandis dai parincj che a volevin savê dai lôr zovins. Ancje la morose di un gno amì e voleve savê, ma nancje jo o savevi di lui. E no ai nancje podût lassâi cheste poesie.
Al fo trement il jesolâ de tiere
che dut al copà.
E fo la fin.
E tal cîl sflamadis di muart
a inceavin i voi.
Po al fo il cidin.
E te gnot dolce, ai sîs di Mai,
tu âs racuelt, cu lis tôs lagrimis,
la sô vite, zovine pueme
tradide intun moment.
Roberto Iacovissi
