Un event unic promovût dal Istitût ladin “Pre Checo Placerean” e dal Comun di Spilimberc, dutun cu la Parochie di Spilimberc, la Arcidiocesi di Udin, la Diocesi di Concuardie-Pordenon e la Arcidiocesi di Gurize, adun cun cetantis altris realtâts dal teritori, jenfri chestis la Arlef (Agjenzie regjonâl pe lenghe furlane), la Societât Filologjiche Furlane, Glesie Furlane, Patrie dal Friûl-Clape di Culture e la Aclif (Assemblee comunitât linguistiche furlane).
Par dâi vite al progjet, che al à par titul “La Bibie par furlan” e che al è in calendari a Spilimberc di martars ai 7 a sabide ai 11 di Avrîl –, i promotôrs a stan cirint 350 di lôr che a vedin il plasê di lei ognidun une part dal Vieri Testament. La formule e previôt la leture in maniere continuade di matine fin sere.
La suaze de manifestazion e sarà la glesie dai Sants Josef e Pantaleon dite “dai fraris” di Spilimberc e la iniziative e tacarà aes 8 sot sere di martars ai 7 di Avrîl fin aes 11.
A screâ l’event, aes 6.30 sore sere, e sarà la presentazion dal progjet, cu la partecipazion des autoritâts; duncje, pre Renato De Zan, docent di Sacre Scriture, al sarà il relatôr dal incuintri che al à par titul “E cambie la lenghe, e reste la Peraule”.
Il program dal event al sta cjapant forme, a fasin savê i promotôrs, ricuardant che la leture e sarà alternade cun incuintris culturâi, concierts di musiche sacre e ancje une visite vuidade, in marilenghe, dal Domo di Spilimberc. Sabide ai 11 di Avrîl il progjet al finirà cu la celebrazion de Sante Messe, ancje in chest câs tal Domo de citât, li che a cjaparan part il locâl Côr parochiâl Sante Marie Maiôr, il Côr Bertrant di Sant Zorç da la Richinvelde e chel di Colorêt di Prât.
La iniziative e ven daûr di un progjet compagn inmaneât tal 2011 a Udin te glesie de Puritât. In chê ocasion, pe prime volte, la Bibie e jere stade lete par furlan di plante fûr e in maniere continuade, par siet dîs e sîs gnots, par 140 oris in dut, cu la partecipazion di uns 1.300 letôrs.
Monika Pascolo
