Tra lis tantis lenghis dal mont che la Pimpa e fevele al è il furlan e al è propit par furlan che la innomenade cjiçute di Altan si prepare a zuiâ cui plui piçui. Domenie ai 16 di Novembar, aes 10.30, tai spazis de mostre “Bon complean Pimpa” – te ex glesie di Sant Francesc (vie Beato Odorico da Pordenone), a Udin – si fasarà un laboratori speciâl ideât e metût adun de ARLeF in colaborazion cul Comun di Udin, intitulât “ARLeF e Maman a presentin la Pimpa par furlan. Zûcs, animazion e leturis in compagnie de simpatiche cjiçute blancje a balins ros”.
La ativitât e je dedicade in particolâr ai fruts dai 3 ai 6 agns che a vivaran tantis aventuris: si scomençarà cu la leture animade di “Pimpa e lis robis” par dopo zuiâ ducj insiemi cul memory creât cun ogjets de sô cjasute plene di colôrs; si cjalarà ancje un carton animât de Pimpa te version in lenghe furlane. Ae fin dal laboratori, ogni frute e ogni frut a varan in regâl un librut de Pimpa par furlan, publicât de ARLeF. La prenotazion al laboratori e je obligatorie e par notâsi al è timp fin joibe ai 13 di Novembar, scrivint a info@sportelfurlan.eu
Chê de cjiçute di Altan e je une storie lungje 50 agns. Une storie che si incrose ancje cu la lenghe furlane, come che al conte ben il panel dedicât ae “Pimpa par furlan” presint te mostre. In cheste maniere la ARLeF – Agjenzie regjonâl pe lenghe furlane e à volût evidenziâ il contribût dal furlan ae storie editoriâl e culturâl de cjiçute a balins. La Pimpa di fats e fevele in marilenghe intune golaine di cuatri libruts ilustrâts, dissegnâts di Altan e publicâts de ARLeF. I volums, pensâts pe prime alfabetizazion, a fasin jentrâ i plui piçui tal mont de cjiçute a balins midiant dai ogjets che si doprin ogni dì, dai colôrs, dai numars, de funzion des robis.
La Pimpa par furlan e je rivade ancje in television graciis ae RAI F-VJ, che e à produsût e trasmetût la version par furlan di tredis episodis, che dopo a son stâts metûts adun tal dvd “Pimpa par furlan” in gracie de colaborazion cu la ARLeF e la Regjon F-VJ.
