Tai Statûts Sinodâi di un comun francês dal 1470, si pues lei la descrizion di un avigniment che al veve un alc di straordenari: ”Ancje se glaçâts e dûrs come un baston (i frutins muarts), a ricjapin flessibilitât sot de azion di un fûc cjarbon, o pûr par vie di cjandelis o lampadis impiadis, mostrant par une sclese di timp un colôr rosât, e colant dal sanc des lôr narilis, a somein cualchi volte sudâ, e mostrâ pulsazion des venis dal cjâf e dal cuel, someant che si vierzès un voli e un sofli cjalt al vignìs fûr des lôr narilis, tant di fâ movi une plume che i vegni poiade vicin”. Si trate di fruts speciâi chei “scjafoâts tal grim de mari”, duncje nassûts muarts, o di chei che a jerin muarts a pene nassûts, cence vê podût jessi batiâts. A jerin muarts cence fâ, lôr, pecjâts, ma pûr cence colpe, ur jere restade su la schene la cjame dal pecjât origjinâl.
Pe dutrine di Sante Mariglesie, il pecjât cometût tal Paradîs di Adam e Eve, al podeve jessi netât dome cul Batisim, ma ancje cul martiri o, ancjemò, cuntune sincere e perfete contrizion dai propris pecjâts, cu la prionte di oparis di caritât; ma in nissun di chescj câs chei frutins a podevin jessi, e nancje par colpe lôr.
I teolics a vevin dibatût a dilunc dulà cjatâ cjase a chescj inocents, e a pensarin al “Limbo” che in realtât, par lôr, nol jere un puest come il Paradîs o l’Infier, ma pluitost une concezion teologjiche di jemplâ; che e esistès, insume, une cundizion temporanie des animis apartignudis a personis buinis muartis prime di jessi stadis batiadis. Ma va a spiegâlu ae puare int, che di dut chest resonament e veve capît che chei frutins a lavin intun lûc dulà che no varessin gjoldût de vision di Diu e nancje cjatât la parentât.
La peraule “Limbo”, pe Glesie, e pandeve une situazion di inciertece teologjiche, e no faseve part de dotrine sacrisante, ma pes maris e voleve significâ la ciertece che il lôr frutin nol sarès lât in Paradîs, e bisugnave sepulîlu magari in tiere sconsacrade.
La religjon uficiâl no jere rivade a cjatâ il pêl tal ûf, ma chê des maris, che no volevin fâ di mancul di cirî une sperance, cualsisei che e fos, e rivà a stabilî che il Batisim si podeve dâ ancje se il frutin muart, par dome un moment, al ves mostrât un bati di voli, o un sofli di aiar.
In France, dulà che chest rituâl al jere une vore slargjât, si clamave ”répit”, respîr, o “dople muart”, e al vignive fat in piçui santuaris. Un di chescj si cjatave in Friûl, a Lauc, e al jere chel de Madone di Trave fat sù tal 1660, dulà che la Madone, secont la tradizion popolâr, e concedeve il “respîr” par podê batiâ il fantulin.
Il “miracul” al viodeve la procession dai parincj rivâ cul cuarpesel dal muart che al vignive metût suntun altâr di piere che si cjatave daprûf dal santuari, e si inviavin lis preieris; e cuant che il frutin al bateve une cee, lu si batiave, magari testemoneant il fat suntun document, cussì che il cuarpesel al podeve jessi sepulît in tiere consacrade.
Il santuari di Trave al veve cetancj ex-vôt che a testemoneavin chescj miracui, a ’ndi son restâts pôcs par vie di continuis sotrazions. La Autoritât eclesiastiche no viodeve di bon voli cheste pratiche “parele” aes sôs liturgjis, tant che tal 1775 pape Benedet XIV, daspò che il Sant Ufici le veve condanade, al improibive cence remission di condusi in “loca santa” i fruts muarts cence Batisim.
E tal 2007 la Comission Internazionâl dal Vatican e stabilive che il “Limbo” nol è un dogme de Glesie, ma dome une teorie teologjiche.
Tal fratimp, in spiete di cheste decision, tantis maris, come a Trave, a vevin cjatade consolazion in chel istant, ta chel respîr, ta chel bati di cee.
Roberto Iacovissi
