E rive dongje la edizion numar 48 de “Fieste de Patrie dal Friûl” e, cemût che e previôt la leç regjonâl 6 dal 2015, la ARLeF – Agjenzie regjonâl pe lenghe furlane, e à publicât un bant par sostignî lis manifestazions culturâls inmaneadis dai ents locâi par celebrâ la date di costituzion dal Stât patriarcjâl furlan, il 3 di Avrîl dal 1077. Pal 2025 la Agjenzie, daûr di chel che e à deliberât la Regjon Autonome Friûl-Vignesie Julie, e à metût a disposizion 50.000,00 euros.
A podaran vê acès ai fonts i ents locâi che a àn la sede legâl intai teritoris des ex provinciis di Gurize, Pordenon, Udin e i siet Comuns furlans de Regjon Venit (Cint, Concuardie, Fossalte, Gruâr, Puart, San Michêl dal Tiliment, Tei).
Daûr di ce che al fisse il bant – disponibil cu la modulistiche par presentâ la domande te sezion “Publicitât Legâl” dal sît istituzionâl de Agjenzie www.arlef.it – a saran finanziadis chês ativitâts che a vuelin celebrâ la “Fieste de Patrie dal Friûl”. In particolâr: events che a pontin a fâ cognossi e/o aprofondî lis lenghis, la storie e la culture dal Friûl; ma ancje la stampe e la difusion di publicazions, libris, audiovisîfs o prodots musicâi che a vedin chest stes obietîf; infin, la preparazion di spetacui teatrâi o musicâi in lenghe furlane. A vignaran esclududis lis domandis là che il finanziament domandât al è mancul di 500,00 euros, e chês cuntune spese calcolade amissibile plui basse di 555,56 euros.
Lis ativitâts culturâls a podaran jessi inmaneadis di un singul ent locâl o di agregazions. Lis domandis a varan di rivâ dentri dai 12 di Fevrâr dal 2025, dome midiant PEC ae direzion: arlef@certgov.fvg.it
Par dutis lis informazions su chest bant, si pues clamâ il numar 0432 555812, o scrivi a: federica.delpino@regione.fvg.it.
