“Avanti cul brun. Lunari di Titute Lalele”, che al veve come sproc “L’anime e gjolt, il cûr al tete”, al è stât dal sigûr il lunari tra i plui cognossûts di chei che ogni an a vignivin fûr in Friûl te prime metât dal 1900. Lu veve inviât tal 1934 e lu puartà indenant fin al 1967 Arturo Feruglio, Titute Lalele come sorenon, che al lavorave te Cjamare di Cumierç di Udin, e che al veve une passionate par scrivi di dut: articui, poesiis, contis e teatri, e par meti adun materiâl diferent par imbastî, ancje cun tantis fotografiis, ogni an, la sô creature.
A miezis tra un lunari, un strolic e une riviste di culture, cun centenârs di pagjinis plenis ancje di curiositâts e di pipins. E se o ai dismenteât alc, che Titute mi perdoni. La cubie dai colaboradôrs dal Lunari di Tite e cjapave dentri nons cetant impuartants, come D’Aronco, Valente, Fornasir, Castellani, Bortotto e parfin Pierpaolo Pasolini. Di no dismenteâ, po, che propit su “Avanti cul brun” a comparirin ancje i prins fumuts par furlan, scrits e piturâts di Fred Pittino e di tancj zovins colaboradôrs, che si inviavin a scomençâ la lôr cariere artistiche.
La cuviertine dal Lunari e puartave il dissen di une caroce tirade di cjavai, e di chi o partìn par dâ cont dal tiermin “brun”, che di no ducj i zovins al sarà cognossût, e che al è la traduzion par furlan di un tiermin inglês, che ai furlans al sarès stât dificil di nomenâ.
Si trate dal tiermin “brougham”, che e jere une caroce a cuatri ruedis, a doi o a cuatri puescj, sierade, che e jere stade inventade tal 1838 dal politic scozês Henry Brougham, e doprade massime pal servizi public. Ma ce centravial il “brun” cu la citât di Udin? La caroce e deventà di mode no dome in Ingletiere, ma e rivà ancje a Udin, dulà che le cjatìn dal sigûr prime dal 1870.
La novitât e veve puartât a un mût di dî popolâr:“Avanti cul brun!”, che Titute Lalele al veve cjolt come titul pal so lunari. Lis stradis di Udin a jerin pe grant part stretutis, plenis di polvar, e di gnot a jerin iluminadis cun lampions a vueli, che a fasevin la lûs che a podevin, stant che ancjemò Arturo Malignani nol veve inventât il mût par produsi chel vueit dentri tes lampadinis, che daspò lis varès fatis funzionâ cu la eletricitât.
Cussì si pensà che il brun, caroce sierade, e ves di lâ ben propit par l’esercizi serâl, che cualchidun al veve pûr dibisugne di doprâ.
Cun di fat, chest lu savìn parcè che la Comission “Vetture” dal Comun, la antenade dal odierni “Servizio con rimessa”, tal Avost dal 1870, e meteve ae atenzion dai sorestants de Municipalitât di Udin, il probleme dai traspuarts citadins di gnot, ricuardant che benzà tal mês di Mai al jere stât inviât il regolament par “l’esercizio dell’industria delle vetture e successiva sorveglianza”, e che a jerin stadis deliberadis 23 concessions che vot di chestis a jerin, apont, par “broughams”.
La Comission e segnalave però che no si ritignive sodisfate pal servizi di gnot, parcè che e veve rilevât che te place de stazion si cjatave dome une caroce “brougham”, e partant e sugjerive al Comun di proviodi a un servizi obligatori di “broughams” di gnot, e cussì al fo fat.
La fortune dal brun, oltri che popolâr e leterarie, no durà cuissà ce: un vincj agns daspò, cambiâts i timps, lis personis e lis usancis, cul progrès a cambiavin ancje i traspuarts, che a vevin di rispuindi a un numar plui grant di personis che a ’ndi vevin bisugne, e cori plui svelts. I traspuarts a corevin sul tram a cjavai, e la citât e coreve daûr dal progrès, tant che la croniche e fevelave de fognadure poiade jù cun metodi moderni e di Malignani, che cu la sô invenzion al veve iluminât la citât. Po dopo al vignarà ancje il tram di Udin. I siei citadins a dismentearan ancje il brun; dome Titute Lalele, sorenon dal resonîr Arturo Feruglio, lu ricuardarà come titul dal so lunari.
Roberto Iacovissi
