Dispès si viôt dome chel che si vûl viodi. Zuan di Ravene, mestri tes publichis scuelis di Udin dal 1359 al 1392, daspò di vê magnificât il Friûl cemût che al veve fat il certaldês Zuan Boccaccio tal so “Decameron”, al ricuarde Udin come citât impuartante par dignitât e par numar di abitants, pal ampli so zîr di muraiis, par vê dut ce che al coventave par vivi, ma ancje – sintît sintît – pe grande socialitât che lui al ricuardave cun “summa voluptate”, forsit par vie des sôs frecuentazions tes betulis citadinis che ancje in chê volte, come vuê, no mancjavin.
Ma ancje il patriarcje di Aquilee Marino Grimani, doi secui daspò, al clamave Udin citât “longe magnificentissima”, ben che l’olandês Zuan Jansen, tal so “Theatrum urbis terrarum”, le clamave “urbs amplissima et magnifica”, ma tal so câs si tratave di un sintût a dî, parcè che nol risulte che al sedi mai stât a Udin. Pal patriarcje Grimani, bontât sô, cundut che al veve il guvier “in spiritualibus” dal patriarcjât, a Udin al veve fat dome cualchi scjampon, preferint al so palaç udinês la miôr vite in chel di Vignesie.
Si podarès ancje acetâ par buine monede cheste magnificence par amôr di patrie, ma al reste il fat che la realtât, in chê volte, e jere dabon diferente. Dit che al è dificil fâsi une idee avonde precise di cemût che la citât si slargjave in chei timps, massime parcè che vueris, taramots e ativitâts umanis a son rivadis a scancelâ in gran part chês olmis, o vin di dî che al è ancje dificil rivâ a ricognossi cuâi che a jerin i contors de antighe, modeste capitâl dal Friûl. Metìn in bande chescj cantins, e disìn che secont la opinion dai citadins di in chê volte, par lôr citadins, la citât e il so cûr a jerin comprindûts dentri de sô tierce cente di muraiis, fate sù dal patriarcje Raimont de Tor tal secul XII, e limitade di chei che a clamavin “puartons”, ven a stâi des puartis internis di Glemone, Sante Lussie, Graçan Poscuel, Aquilee e Cividât.
Po dopo a rivaran i borcs, dentri de gnove cente, scomençade dal patriarcje Pagan de Tor viers il 1440. Si trate di borcs par mût di dî, che al sarès di clamâju come vilis, cun cjasutis bassis di contadins, separadis di orts, di braidis, di zardins, di piçui muruts, di “paladis”, dulà che si podeve cjatâ in bondance, toblâts, stalis, ledanârs e mussulins.
O vin ancje un document, une sorte di statistiche, che nus fâs savê che tal an 1560 si cjatavin, in chei puescj, 1.400/1.500 cjasutis. Almancul ai prins dal secul, une vore di lôr a vevin il cuviert di paie, la façade, massime chê che e lave dal prin solâr in sù, di len neri par vie dal fum; lis stanziis a vevin pocje lûs e mancul aiar, a jerin bassis e cun tante umiditât che e spissulave dai mûrs.
Dut câs ancje se il Comun, a partî dal 1502, al improibive, a chel che al faseve une cjase gnove o le meteve a puest, di fâ un cuviert di paie, e plui indenant al improibive di doprâ il len pes façadis des cjasis, no ducj a sintivin di chê bande, tant che il Comun al veve metût dongje cierts ispetôrs cul voli lunc, di mût di segnalâ lis infrazions, che no si sieravin, come vuê, cuntun dai tancj condons.
Cussi, a un predi che al veve fat il cuviert de sô cjasute in paie tal borc di Roncjis, i veve ordenât di disfâlu, e istès al veve fat cul paron di cjasis des bandis dal borc di Graçan, che al veve scugnût disfâ la façade in len, e fândi une in muradure. Dut chest no parcè che lu ves imponût une comission pal bilisiament, ma parcè che si veve une pôre mate dal fûc, che ducj si ricuardavin ancjemò dal brusarili che tal 1419 al veve brusât, tai borcs di Vilalte, Glemone e Sant Lazar passe 2.000 cjasutis, cun animâi e personis, e chei dal 1471 e 1481, che a vevin sdrumadis cetantis cjasis e tantis fameis che i “studefûcs”, in chê volte, no jerin rivâts, ma lafè no, a distudâ par timp.
Roberto Iacovissi
