I Benandants, figuris positivis ma ancje dibatudis, dongje di cui che ju jude te lote cuintri des fuarcis dal mâl, a son i protagoniscj dal gnûf zûc di rûl par furlan di fâ ator di une taule, realizât dal F.Lu.S. Foro Ludico Spilimberghese APS, in graciis dal contribût de ARLeF, de Regjon Autonome Friûl-Vignesie Julie e cul jutori de Banca 360 FVG. La associazion F.Lu.S. e à volût celebrâ cun chest progjet i vincj agns de lôr ativitât. La idee, peade a strent cul teritori e cu la sô lenghe, si concretize intun invît a jentrâ intes storiis dal passât furlan. Il lengaç dal zûc, di là di jessi un imprest culturâl e sociâl, al devente une maniere par svicinâ i zovins a cognossi lis lôr lidrîs. “Noctes Temporæ – Il zûc di rûl sui Benandants”, chest al è il non dal zûc, al è stât presentât al assessôr regjonâl aes Autonomiis locâls, Pierpaolo Roberti, di Simone Pasquin – vicepresident di F.Lu.S. -, che al à scrit il regolament dal zûc, e di Franco Sarcinelli – coordenadôr dal progjet, adun cul president de ARLeF, Eros Cisilino e cul diretôr de Agjenzie, William Cisilino.
«Cun cheste iniziative o vin une gnove oportunitât par fâ cognossi la culture e la identitât furlane e par promovi il furlan. In chest câs, lu fasìn intune maniere dal dut gnove, mai provade prime, cuntun zûc di rûl. O cjaparìn dentri fetis di popolazion che fin cumò, cu la ARLeF, no vevin mai tocjât. Ancjemò une volte compliments ae Agjenzie», al à declarât l’assessôr regjonâl aes Autonomiis locâls, Pierpaolo Roberti.
«Zuiâ par furlan al vûl dî doprâ la lenghe, trasmetile e fâle cressi, parcè che une lenghe vive si fevele, si scolte e si condivît, soredut te vite di ogni dì. Il zûc al è sigûr fra lis esperiencis che a rivin miôr a meti in contat gjenerazions diferentis, stiçant la creativitât e creant ocasions di incuintri. Cun Noctes Temporæ dut chest si fâs par furlan, che al devente il protagonist de esperience. Par chest, o ai agrât ae associazion F.Lu.S. Foro Ludico Spilimberghese. Graciis a un lavôr lunc e condividût, a àn metût adun un progjet che al puartarà intes cjasis dai furlans no dome la lôr lenghe, ma ancje un patrimoni preziôs di storie, tradizions e crodincis popolârs», al à marcât Eros Cisilino, president de ARLeF.
«La sfide plui inmagante di Noctes Temporæ e je chê di fâ tornâ a vivi, midiant dal zûc, fats sucedûts pardabon in Friûl, par che i zuiadôrs a rivin a viazâ in chê realtât storiche. In chescj vincj agns o vin colaborât cun tancj ents e associazions cun chê di creâ esperiencis ludichis sul teritori; cheste volte, invezit, o vin volût contâ di noaltris, fasint un zûc che al rapresentàs la nestre essence. Al è stât un lavôr corâl, nassût dal contribût di dute la associazion e di altris realtâts come la nestre, presintis sul teritori», al à contât cuntun scrit Pierangelo Spagnolo, president dal F.Lu.S. Foro Ludico Spilimberghese APS, ringraciant la Regjon Friûl-Vignesie Julie, la ARLeF e Banca 360 par vê sostignût il progjet. Il zûc al è za a disposizion e al larà indenant tal so percors di divulgazion intes bibliotechis, intes ludotechis e in ocasion di cualchi incuintri public in program tai mês che a vegnin.
Noctes Temporæ – ilustrât di Francesco Bisaro, cui contignûts storics curâts di Paolo Paron, lis traduzions par furlan di Claudio Romanzin e la consulence linguistiche de ARLeF – al è pensât par cjapâ dentri grups piçui di zuiadôrs (di 3 a 5, dai 14 agns insù). I partecipants a cjapin il rûl di un dai protagoniscj de storie e, cu lis lôr sieltis, a puedin creâ contis di fantasie. Il mont là che si davuelzin lis aventuris al è ispirât al Friûl rinassimentâl: une tiere di confin e di passaç, crosere di popui, lenghis e crodincis. Dopo secui di dominazion spirituâl e temporâl dal Patriarcjât di Aquilee, il teritori al è sot de influence de Republiche di Vignesie, ma al reste viert aes pressions dal Imperi Asburgjic e aes influencis de Riforme protestante.
Ogni aventure di “Noctes Temporæ” e je une narazion: ce che ur capite ai protagoniscj e lis lôr azions si davuelzin intune secuence di senis che a son i tocs de conte di cemût che a àn frontât la menace dal antagonist. Lis contis si puedin frontâ intune partide uniche (une serade di zûc che e dure 3-4 oris) o spartîlis in incuintris plui curts, clamâts sessions. Ogni conte e je une vicende indipendente, ma al pues jessi interessant lâ indenant cun aventuris gnovis, doprant i stes personaçs e fasint evolvi il lôr caratar e la lôr storie personâl, interpretant i efiets des esperiencis straordenariis vivudis intai incuintris precedents.
Par plui informazions: www.noctestemporae.it | info@flussiludici.org | info@noctestemporae.it
