Tal tesaur dal Domo di Vençon, si ten di cont un relicuiari dal Cuatricent di arint dorât. Il ricet di veri al conten une spine, che la sô storie e sarès peade a chê dal pes di Avrîl.
Se si spiticais di cirî cheste vôs su la Enciclopedie “Treccani”, o podês ancje lei che cualchidun al pretindarès di ripuartâ cheste storie a un miracul che al sarès sucedût a Aquilee ai timps dal patriarcje Bertrant. Ma si zonte che la vere storie dal pes dal prin di Avrîl e sarès stade scrite daûr di une donazion che il re Pipin al fasè al Pape, su di une bergamine fate cu la piel dal Agnus Dei.
Se la “Treccani” e ripuarte la crodince di Aquilee, al è parcè che e esist, di fat, la liende dal miracul de spine che al sarès sucedût ai timps di Bertrant. E conte che il patriarcje, che i tignive a vê il Pape in Friûl, se no intune visite pastorâl, almancul a un gustâ di chei che la cusine patriarcjâl e jere famose, al veve invidât il Pape a un gustâ la zornade di Pasche. Ma lui, in chê zornade, al veve un impegn impuartant: chel di batiâ la fie dal re di France, e figuraitsi se al podeve mancjâ!
Ma i stiçave ancje l’incuintri e il gustâ cul patriarcje; cussì i fasè savê che prime al varès fat vulintîr un scjampon in Friûl il prin di Avrîl, che al jere di Vinars Sant di Cuaresime. Ma il gustâ, in chê zornade, al veve di jessi di magri e no di cjar, come dal sigûr al varès preferît il patriarcje, che cundut de sô etât, i plaseve ancje il cicin.
Cussì si fasè un grant tratament cu la consumazion di grandis cuantitâts di trutis dal Nadison, che a plaserin ancje al Pape; ma par disgracie la spine di un pesson che al veve a pene mangjât i restà impirade tal cuel, riscjant di scjafoiâlu.
Al sucedè un moment di spavent e di pôre, intant che i presints a continuavin a rumiâ, cu la massime atenzion, lis cjars sauridis des trutis; in dal rest, cui podevial meti man a gjavâ la spine dal cuel papâl?
Par fortune, vuelistu pal viaç che pe mangjative, il Pape si indurmidì. Tal indoman – ve culì il miracul – il Pape si sveà come se nol fos sucedût nuie; cheste e je une poesie che si cjate, cun altris, intune racuelte di manuscrits te biblioteche di Vençon.
Ma al reste di stabilî cemût che di chest miracul si è rivâts al pes dal prin di Avrîl intindût come scherç. Culì nus jude une interpretazion di un dai poetis di chê fraterne, che si firmavin dome cun anagrams o pseudonims: Rumtot, che al scrîf che di chel fat e je rivade la usance dal pes di Avrîl. Prime, preparâ un pes e jere une ofese; dopo al deventà un scherç, parcè che, colant tal prin di Avrîl une vilie, si dave al gustâ di gras la forme.. di un pes. No metarès une man sul fûc su la interpretazion dal poete Rumtot – Gasparo Carabello, secul XVII, che al faseve part di une cubie di poetis matarans.
In dal rest, nol risulte che un Pape al sedi rivât in Friûl ai timps di Bertrant. Almancul che no lu vebi fat in incognite.
Roberto Iacovissi
