Tal 1999 pre Antoni Beline, al à vinçût il Premi Leterari San Simon pe sagjistiche cun “Trilogjie Tormentade”. Un lavôr ch’al cirive te vite di don Lorenzo Milani, Oscar Wilde e Pier Paolo Pasolin, oms cun posizions e liendis personâls cetant diferentis e cence colegaments tra di lôr «insegnament, sapience, profezie, regule di vite, riflès di Diu là che par solit no si va a cirî».
Trê «animis che a àn tormentât e metût in crisi une socjetât rassegnade, rinunciatarie, passive doprade e ricatade dal podê e imbroiade in mil manieris. Ognun di lôr al è un puestin che che nus consegne un mes impuartant e morâl de bande di Diu, ancje se no simpri il puestin, come tal câs di Pasolini e soredut di Wilde, nol è il plui presentabil e adat a fânus predicjis, almancul seont il resonâ “normâl” de int “nomâl”. […] Ma une persone libare e cjale ce che al è scrit te letare e no cemût che al è munturât e barbirât il puestin».
Tes vitis dai trê pre Antoni si spieglave e al rifleteve ancje su la situazion dal so timp e da la sô vite.
Il Grop amîs di pre Toni e il Comun di Codroip, cu la colaborazion de Parochie di Sante Marie Maiôr, dal Caffè Letterario Codroipese e de SOMSI di Codroip, a an pensât di inmaenâ tre incuintris par rifleti se, 25 agns dopo, il test di pre Antoni ancjemô nus fevele.
I incuintris a saran ducj a lis 18 inte “Sale Gnove de Canoniche di Codroip (daûr dal Domo)”.
Chest il calendari e i relatôs dai incuintris: ai 11 di Avrîl, Bruno Forte al interven su “Don Milani: Predi in scuele e mestri in glesie”; ai 15 di Mai, Walter Tomada al fevele di “Oscar Wilde: La moralitât di un inmorâl” e ai 5 di Jugn Mario Turello si soferme su “P.P.Pasolini: Om contraditori e segnâl di contradizion”.
