Al jere il 2008 cuant che la Fuel (Federal Union of European Nationalities) e à inmaneât la prime Europeada, une competizion di balon pes selezions des minorancis linguistichis europeanis. La idee e jere chê di zuiâle ogni 4 agns, cussì tal 2012 e je stade inmaneade la seconde edizion, tal 2016 la tierce e tal 2022 la cuarte (rimandade di 2 agns par vie dal Covid). La partecipazion e je pardabon buine (17 scuadris la prime volte, deventadis 24 la ultime), ma fin cumò e veve simpri vinçût la nazionâl dal Südtirol: a vevin di rivâ i furlans par dâ un pôc di moviment al torneu! Di fat, la biele novitât di chest an e je stade la partecipazion de nazionâl furlane, graciis ae fondazion de Associazion Sportive Furlane che subite si metude tant che obietîf la partecipazion a chest prestigjôs campionât, che e je stade pussibile graciis al jutori de Asd Union Martignacco (par convocâ i zuiadôrs bisugnave poiâsi a une scuadre iscrite ae Figc).
A son stâts convocâts 20 di lôr: 18 a zuin in Friûl e doi a son furlans che a zuin in Sicilie e Calabrie, ven a stâi Davide Tosolini (Milazzo) e Francesco Costa (Locri). La scuadre e jere completade di Daniele Puntel (president), Gabriele Violino (team leader), Mauro Lizzi (alenadôr), Devid Trangoni (secont alenadôr) e Alessandro Galasso (fisioterapist). Cussì e je scomençade la aventure. Lis partidis a son stadis zuiadis te regjon dal Schleswig (sul confin jenfri Gjermanie e Danimarcje) cuntun program une vore plen e impegnatîf, parcè che dute la competizion e je durade mancul di une setemane, cu la prime partide ai 30 di Jugn e la finâl ai 6 di Lui. Za cussì e sarès stade une biele gnove, sedi pe storie di chest torneu che al met al centri chei “popui cence stât”, lis minorancis linguistichis (e in Europe a ‘nd è une vore), sedi pal fat che infin ancje il Friûl al è rivât a vê la sô scuadre e a partecipâ.
Ma i fantats di Mauro Lizzi e Devid Trangoni a son rivâts a maraveâ ducj vincint une partide daûr chê altre: il ziron al è stât dominât vincint prime cuintri dai Slovens in Italie (4-2), po cuintri dai Ongjarês in Romanie (4-1) e infin cui Ongjarês in Gjermanie. Intai cuarts di finâl la nestre rapresentative e à butât fûr de competizion i Todescs in Polonie (2-1), cussì come che e à fa tinte semifinâl cui Danês in Polonie (3-0), rivant in finâl. La partide plui impuartante, duncje, si è zuiade sabide ai 6 di Lui e il Friûl al à vint cuintri de scuadre de Ocitanie cuntun sec 2-0, fasint la imprese di vinci il torneu ae prime partecipazion. Tancj tifôs a spietâ la scuadre intal aeropuart cun cjants e bandieris, e l’auguri – vignût di plui bandis – di une partide cuintri l’Udinês, un derby furlan par festezâ cheste imprese.
Une riflession nus reste, leint i nons des scuadris: pe plui part si trate di minorancis di un popul che a vivin fûr dal lôr stât: Ongjarês in Romanie, Todescs in Polonie e vie cussì. La scuadre dal Friûl, invezit, e je la scuadre di un popul a part, une vere “nazion cence stât” cuntune storie e une culture che a son dome sôs. Tignìn di cont cheste ricjece!
Francesco Spizzamiglio
