Il Manifest de comunicazion no ostîl di “Parole O_stili” al è disponibil ancje par Furlan. La gnove e je rivade sabide ai 24 di Mai inte cunvigne «Disarmâ lis peraulis par comunicâ Sperance» che la Arcidiocesi e à inmaneât spetant la Zornade mondiâl des Comunicazinos sociâls, il prossim prin di Jugn. Il Manifest al è stât voltât par Furlan intai mês passâts de bande dal CIRF (Centri interdipartimentâl pal svilup de lenghe e de culture dal Friûl) de Universitât di Udin e publicât in timp pe cunvigne dulà che la fondadore di Parole O_stili, Rosy Russo, e je intervignude. «O sin braurôs di presentâ il Manifest ancje par Furlan», e à dit Russo.
Il Manifest e je une liste di dîs principîs di buine comunicazion digjitâl e no dome, utii ancje par disberdeâ discussions e, in generâl, cjalâ a ognidun cun rispiet e dignitât. Tacant des peraulis che si disin (o che si sielzin di no doprâ). Sul sît di Parole O_stili e son a disposizion 41 traduzions dal Manifest. Di cualchi zornade lis traduzions e son 42.
La Arcidiocesi e à regalât a ducj i presints ae cunvigne dal 24 di Mai un cartonut cu la stampe dal Manifest in marilenghe; tantis copiis in plui e son stadis bielzà puartadis vie de bande dai partecipants, ma intal Ufizi diocesan pes Comunicazions sociâls e je a disposizion cualchi copie in plui.
G.L.
