La invocazion di parânus ju i nestri debits, inte preiere che nus à insegnât nestri Signôr, e ven di lontan, dal cûr dai Profetis, che a vevin imbastît un an di Gracie, il Jubileu, par praticâlu pardabon. Po’ e je restade alì, tant che lis preieris mandadis a memorie, cence abadâi. Par dî il vêr intal Jubileu dal 2000 lu vevin cjapât a pet e inviadis dôs iniziativis, une inte nestre diocesi di Udin pai puars di chenti cence cjase: il Fogolâr, e une par ricuei bêçs e scancelâ il debit cul esteriôr di passe 40 Paîs puars.
Dopo 25 agns cuâi sono i numars che a pandin i disastris dal debit “e(s)terni” dai Paîs plui puars de tiere? A son di 29.000 miliarts di Euros/dolars, la plui part gjenerâts dai Paîs siôrs, ma che i ai fasin puartâ ai Cireneus puars dal Sud dal mont. Un numar tant grant che al è dificil ancje di imagjinâlu. E cualis sono lis consecuencis? La prime e je che il presit dai cereâi al è partît viers il alt, tant che une suste liberade. Prin a àn cirût di dâi la colpe a la vuere in Ucraine, po’ si è pandût che al è il risultât de speculazion finanziarie, simpri pronte a a trasformâ lis disgracie di tancj in fortunis di pôcs. Si sa, aromai, che i presits a son consecuencis no di scjarsitât o bondance dai prodots, ma di scomessis e speculazions dai marcjâts e des Borsis. La fan, la recession e il ricori ai debits a son consecuencis diretis. Cussì i Paîs puars a àn di “contentâsi” di podê rivâ a paiâ i interès dai debits e no cjatin risorsis pe sanitât, pe scuele, pai invistiments inte agriculture e inte industrie, par rispietâ la tiere, pes consecuencis dai cambiaments dal clime, par doprâ e vendi lis risorsis primariis, che i Paîs industrializâts a cirin di caparâlis tant che i ludrons che no àn mai vonde. Ven a stai che 3,3 miliarts di personis su la tiere a vivin in Paîs che a spindin plui bêçs par paiâ i interès che par garantî la scuele e la sanitât. Se in Italie al ves di capitâ chest e scloparès la rivoluzion sociâl e civîl, ma stant che ur tocje a chei altris, a nô talians no nus fâs tant câs e si rive a durmî serens ogni gnot, dopo cenât e fat di spetadôrs devant dal casselòt a cui che al à vinçût premis.
Cemût paino i debits i stâts? Cu lis jentradis publichis: lis tassis diretis e indiretis, lis impostis, i tribûts, che a sgarfin cun puntili seletîf sui redits, i patrimonis e i consums, po’ a metin su lis Acisis, l’Iva, la Tari, l’Imu, lis marcjis di bol sui certificâts e ogni cagnere che tu domandis al public. Il stât al met sot ducj a scuedi e tirâ su bêçs par lui. E dut sot il control e il voli seriôs dal Fisco. Nol è un câs che par furlan, co si à di descrivi il caos, si dopri, cuntune clare alusion e riferiment, la locuzion: al è dut un Fisco!
Alore ce fâ? La cuote plui umane de nestre societât e domande che a vegnin scancelâts i credits vantâts viers i 45 Paîs plui puars de tiere, che a son il 13% de popolazion. Cheste int e sorevîf cun pôc e nuie e a son la metât dai puars di dut il mont. Nissun si domande cualis che a son lis causis des puaretâts, ma si sgrisulisi dome pai efiets spampanâts sui media. Intal nestri mont passût i debits a son segnâl di bondance, par vie che si lassiju fâ dome ai siôrs, biel che pai puars a son la condane a muart e a la disperazion. Se a vessin di vê i debits di un Paîs puar in Italie nancje no si scomponaressin, ma par lôr a son la condane a la fan, a la dipendence struturâl e la suste par che i zovins a vedin di lâ a cirî pal mont fortune e vite democratiche. Dute la economie, che e je deventade finanziarie, che al vûl dî: bêçs e vonde, e ubidìs a la logjiche dal vivi su lis spalis di chei altris e intal strucâju, i puars, tant che limons. La finance e à intai vôi il simbul dal Dolar o dal Euro, tant che Paperon dai Paperons. E je indiferent e cence cûr, no i interesse de int che e mûr e, se mai, e prodûs e e space armis di ogni cualitât, scomençant a dâ fûr chês vanzadis intai magazens, pal mantignî la paronance.
Il Pape Francesc, recuie, al veve proponût cinc pas concrets che a cambiaressin lis regulis dal zûc di muart: scancelâ o ridusi al minim lis spesis e l’interès pal debit esterni, par che non resti eterni; convertî il debit in spesis e invistiments pal progrès de int dal lôr Paîs; impegnâsi cuintri la evasion fiscâl des multinazionâls e i Paperons par ducj a contribuissin al ben di ducj; disponi e dâlu, de bande dai Paîs plui siôrs, almancul il 0,7% dal Prodot Interni Sporc pe cooperazion tra Paîs siôrs e puars. Chest lu domandin di tant timp in ca ancje lis Nazions Unidis. Si viôt che tant il Pape che lis istituzions internazionâls a son usadis a predicjâ intal desert, tant che Zuan Batiste. E la int, che no rive a condizionâ la politiche sorde e vuarbe e i Guviers? Che e provi, cuntun mût di vivi sempliç e coerent, a sostignî almancul i progjets dai Missionaris e des Glesiis nestris sûrs, che a procurin di simpri a servî il lôr popul pe liberazions cul don dal Vanzeli e lis Oparis de caritât.
