Altris timps, mighe come vuê che tantis glesiis a son vueidis, e che implenâlis e je une fadie… dal diaul! Par indaûr, o fevelìn di saeculorum, te citât di Udin la vuide spirituâl dai fedêi e jere afidade dal dut ae plêf di Sante Marie (Domo), ma cundut che si davin di fâ une vore, chei dal Cjapitul no rivavin a dâ rispuestis a dutis lis dibisugnis spirituâls dai bogns cristians di chel timp.
Al sucedè che la confraternite di Sant Cristoful, che di jê o vin une prime memorie dal 1294, si apelà al patriarcje Nicolau di Lussemburc, par vê la aprovazion patriarcjâl di fâ sù une capele su la plaçute che in chê volte e stave pognete sot dal cjistiel e vie Glemone. Il patriarcje, simpri atent aes dibisugnis dai fedêi, al consentì di cûr ae richieste, e finalmentri ai 17 di Avrîl dal 1358, ae presince dal patriarcje, di sîs vescui di altris diocesis e di cinc abâts, cuntune grande cerimonie e une sdrume di popul, e fo metude jù la prime piere de capele.
Tal 1597 e fo ancje istituide, dal patriarcje Barbaro, che daûr des indicazions dal Concei di Trent al veve dividude la citât in nûf parochiis, chê di Sant Cristoful, ma intant la capele no bastave plui, e cussì si decidè di fâ sù une glesie cu la tor e cun chel biel portâl di Bernardino di Bissone. La glesie, dopo tancj agns, e veve dibisugne di cualchi justadute, ma lis palanchis no sunavin masse te borse, e cussì si rinviave di timp in timp. Fin che, ai 5 di Dicembar dal 1756, un montafin di chei che si viodin ancje vuê, cuntun aiaron di bissebove, al parà jù de piche de tor la crôs e la piere che i stave sot cuntun grant davoi, e la disperazion dai fedêi.
Al jere alore procuradôr de confraternite il nobil cavalîr Filip Florio, scunît ancje lui fûr di misure tal viodi chel disastri. E par vie che cence crôs, e cence piere, no si podeve stâ, al decidè di meti man al lavôr e ae sachete. Nobil e cavalîr al jere il Florio, ma ancje judiziôs, massime cuant che si tratave di spindi. Al pensà subite di meti a puest lis robis, e alore “fece più trattati coi murari della città”; in sumis, si fasè fâ dai preventîfs pai lavôrs che a coventavin.
Chei muradôrs citadins i faserin savê, a sô ecelence, che par tornâ a meti in sest crôs e piere, tra lavôr, armaduris e argagns pe sigurece – che il lavôr al jere intrigôs – il dut al sarès costât aes cassis de confraternite 400 ducâts, plui o mancul. Un colp pal puar Florio, che come usance al pensà di rinviâ il dut “al seguente maggio”. Par sô fortune, tal fratimp si presentà un “muraro contadino” che al vignive de campagne e chel, “esibendosi di fare tale opera”, i fasè il presit di 40 liris, cun doi oms in zonte, cuardis e un len. Al nobil no i pareve vere, e al spesseà a acetâ la ufierte, stabilint ancje la zornade che al sarès stât fat il lavôr: ai 18 di Mai, che il nobil al jere ancje precîs. Te zornade stabilide, il “muraro contadino” al comparì cuntune altre persone, e a buinore a prepararin dut chel che al coventave pe esecuzion dal lavôr, jentrant, cun cuardis e scjalis, fin su la piche de tor, lant sù e jù cun dute facilitât par une cuarde che e jere stade fissade par un rochel parsore une curnîs. Un spetacul di no crodi, che par sot la int e cjalave maraveade come intun sium. Dopomisdì, aes siet di sere, il “muraro contadino” al cjapà sù la piere e la crôs e aes vot di toc al rivave a fissâ la piere e la crôs su la piche de tor, cence nissun pericul pe int che e stave di sot.
Sodisfats il Florio e la int par chê imprese cence armaduris e argagns di sigurece. Cetant di mancul i “murari cittadini”, che a jerin rivâts a spiticâsi cun chê di fâsi une ridade, e che a cjalavin, scunîts, in sù, biel che il popul, che une no ti perdone, ur rideve daûr, ju sbeleave e ju bufonave di gust.
Roberto Iacovissi
