Al è pront il gnûf Lunari di pre Toni 2027: “Par simpri cun voaltris”. La gnove edizion e torne a proponi un apontament impuartant par ducj chei che a tegnin al Friûl, ae sô lenghe e aes tradizions, e che a vuelin contribuî a mantignî vive la memorie di pre Toni e a sostignî i progjets di solidarietât in Benin.
Alida Pevere e Cristian Liberale, curadôrs dal lunari, a àn coordenât il lavôr editoriâl, pensât par ricuardâ pre Toni tal vincjesim aniversari de muart.
Pre Roman Michelotti, president di Glesie Furlane, di simpri vicin a chest progjet, al ricuarde cussì il so amì Pre Toni: «A son passâts 20 agns. Ma la sô peraule, i siei scrits, i siei lavôrs, lis sôs batais e scombatiments, che i àn costât incomprensions, soferencis e lagrimis, a son di une modernitât e atualitât uniche. Il so pinsîr e il so penâl no àn pierdût par nuie di valôr. Il so scrivi sempliç e lineâr, ma altretant profont e sapient, ancje il mancul espert in leture furlane al rive a capîlu e a gjoldilu. No ai nissune dificoltât a ritignîlu un profete dal dì di vuê pe nestre glesie e pal nestri popul. Un profete che al è vîf e che al fevele ancjemò cui siei scrits e cu la sô testemoneance. Magari cussì no, ducj i profetis, in vite a àn subît incomprensions, acusis, condanis, menacis, esclusions… Lu dîs di plui bandis ancje il Vanzeli (Mt 23, 29-31.37: Mc 6,4; Lc 11,47; 13,34). O sai ben trop che pre Antoni al pative pal fat di no jessi capît. Dutis lis sôs batais a jerin sburtadis di un grant amôr e passion pe nestre Glesie e pal nestri popul, cence nissune pice di cariere. Lu faseve a mût so, cul so caratar, cul so impit, parcè che e jere la sô maniere di jessi. Se si ves pretindût di lui plui diplomazie, magari cuntune prese di ipocrisie, nol sarès stât pre Antoni».
Il Lunari al è stât insiorât de cuviertine realizade di Carla Lostuzzo e dai dissens di Otto D’Angelo, Vera De Tina, Gianni Di Lena, Daniele Giacomini, Aldo Mereu, Monia Minisini, Roberto Monticoli, Sofia Novelli, Fausto Tosolini e Anna Zamolo, che cul lôr lavôr artistic a àn dât forme e caratar ae gnove edizion e Canzio Di Fant che al à contribuît cu la fotografie dedicade al mês di Novembar.
Tantis personis gjenerosis a sostegnin cheste iniziative; DIGAS di Colorêt di Montalban, Bancje 360 Credit Cooperatîf FVG di Basilan e ae difusion a partecipin ancje la int des parochiis di Visepente e Vilevuarbe cun pre Gabriel Vasile Cimpoesu, Mels e Pers cun pre Giuliano Mauro, Vilegnove cun pre Romano Michelotti, Vençon cun pre Roberto Bertossi e Vît, Clausêt e Pinçan midiant di pre Italico José Gerometta, i Comuns di Basilian e Colorêt di Montalban e la emitent Video Tele Carnia.
Fin in Zenâr il Lunari si po cjatâlu in chestis ativitâts: bar “Al Mattiniero”di Visepente, edicule di Bertiûl, bar-edicule Saccomano di Gnespolêt, edicule “Da Maurizio” a Codroip, cartolarie “Cartoltecnica” a Cjampfuarmit, “Bar Masino” a Mels, edicule di Colorêt di Montalban e “Minimarket da Lidia” a Majan.
I Amici di Udine, in partence pal Benin in Zenâr, a continuaràn a puartâ indenant la opare tacade di pre Toni: fâ poçs di aghe, scuelis e mensis , intes missions de zone di Kandi e Setto.
Il Lunari di pre Toni 2027 al è cussì il risultât di un lavôr coletîf che al unìs culture e creativitât furlane a un impegn concret di solidarietât che al va indenant di ben vincj agns.
Par ogni altre informazion si podin consultâ lis pagjinis facebook “Grop Amîs di Pre Toni”, “Amici di Udine” e “Glesie Furlane”.
