Il progjet ARLef si indrece ai minôrs di 28 agns che a fevelin furlan
La ARLeF – Agjenzie Regjonâl pe Lenghe Furlane e clame dongje fantatis e fantats, cun mancul di 28 agns, che a vuelin deventâ YouTubers o che za lu son par selezionâ une scuadre di zovins che a vedin voie di contâsi al mont, di condividi lis lôr passions cui coetanis e di esprimi il lôr talent, par furlan, ma no dome. Il progjet, in fat, si indrece ancje a cui che il furlan lu fevele pôc o no dal dut. Alc che nol pues mancjâ ai candidâts, però, e je la voie di metisi in zûc e di contribuî a sburtâ cheste iniziative.
Par chest progjet, di fat, la ARLeF e à in program di creâ un gnûf canâl dulà che lis fantatis e i fantats a puedin interagjî, condividi, informâ, imparâ, cjapâ ispirazion, ognidun cul so stîl personâl! A saran propit lôr, i YouTubers selezionâts, a sielzi i argoments di tratâ, lis modalitâts par fâlu, a dâ forme e struture a un “lûc” dut gnûf e che al cambie simpri!
Candidâsi al è sempliç. Dopo jessi jentrâts sul sît arlef.it, lant jù a bas fin a rivâ ae vôs “gnovis” al bastarà clicâ sul banner dedicât: “AAA si cirin YouTubers”. Dentri dai 12 di Mai, jentrant tal form (https://arlef.it/it/aaa-youtuber-cercasi/) si varà di inviâ la proprie video-presentazion curte (realizade ancje cul smartphone), contant la proprie passion e l’argoment che si volarès tratâ intal ambit dal gnûf canâl. Cui che al à za esperiencis tant che YouTuber al podarà indicâ ancje il leam al so canâl. Par sclariments dal câs, i candidâts a podaran inviâ un messaç di pueste eletroniche a info@sportelfurlan.eu o clamâ il 04321743400.
Duncje … Âstu mancul di 28 agns? Âstu voie di fâ il YouTuber? O lu fasistu za? Alore il gnûf progjet ARLeF al è par te. Cliche achì https://bit.ly/2QDE1mM e partecipe
