Un concors par selezionâ tescj teatrâi in lenghe furlane e, in maniere dal dut straordenarie, par dâ vite a une racuelte di contis curtis te suaze dal progjet “No smenteâ”. A son i doi progjets puartâts indevant de Associazion teatrâl furlane (Atf), adun cul Ent Friûl tal Mont e la Societât Filologjiche Furlane e cu la poie de ARLeF, la Agjenzie regjonâl pe lenghe furlane, cun chê di valorizâ a ogni nivel il teatri furlan, la culture e la marilenghe.
Il Concors, rivât ae edizion numar 14 (al è bienâl) -che te edizion ultime al veve tirât dongje adiriture 23 copions, di chescj cuatri za lâts in sene e trê rivâts dai Fogolârs Furlans – al è risiervât al gjenar “comedie” – brilante, ironiche cuntune biele fin – pes categoriis “monolics” (cun tescj che no àn di passâ lis 1.000 peraulis), “curts teatrâi” (senis curtis o ats unics cuntune lungjece massime di 8 pagjinis) e “tescj teatrâi complets” (cun 45 pagjinis al massim). Ducj i componiments a àn di jessi inedits, mai publicâts, mai premiâts e nancje proponûts sul palc. La iniziative e je vierte a ducj, ancje ai coregjonâi che a son a stâ tal forest, baste che a vedin almancul 18 agns.
Lis iscrizions al concors a son za viertis e si sieraran ai 31 di Avost, biel che pe spedizion des oparis al è timp fintremai ai 31 di Dicembar.
«In cheste edizion o vin pontât su la comedie cun teme libar cul invît a mandâ tescj divertents e lizêrs – al dîs il president di Atf, Guido Covazzi –; lis oparis finalistis, selezionadis di une jurie a saran votadis des compagniis teatrâls associadis ae Atf, intant che la serade finâl dal Concors e je previodude pal mês di Avríl dal an che al ven».
Chest an, dongje de “gare”, in ocasion dal 50m aniversari dal taramot, e ven proponude une racuelte di contis cun titul “No Smenteâ”, vâl a dî tescj naratîfs curts e inedits (che no passedin i trê mil caratars gjavant vie i spazis), scrits memoreant il taramot dai 6 di Mai dal 1976. «A puedin jessi mandâts no dome de bande di cui che al à vivût la tragjedie in prime persone – al sclarìs Covazzi –, ma ancje di cui che ’ndi à sintût fevelâ, di cui che si cjatave fûr regjon. Dongje des testemoneancis – al zonte – a son acetadis ancje contis di fantasie, baste che a sedin simpri leadis al sisme di cincuante agns indaûr».
La idee e je chê di tirâ dongje i tescj e di metiju adun intune specifiche racuelte su cjarte par leturis senichis che e podarà jessi ancje pandude traviers dai canâi digjitâi, cu lis oparis che tal avignî a saran presentadis tant che introduzion ai putrops spetacui teatrâi, par cure de Atf. Par inviâ lis contis al è timp fin ai 15 di Setembar.
Te suaze dal progjet, in Setembar – in maniere di ufrî ocasion di formazion a gratis par cui che al vûl misurâsi te composizion di tescj teatrâi par furlan – al tacarà un cors in linie di scriture creative cun titul “Scrîf Scrîf! Scrîf!”, biel che al è a pene finît “Peraulis in sene”, cors sui metodis di svicinament ae sene tacant di un copion o di un scrit teatrâl, par cure de associazion “Servi di Scena-Matearium”.
Sul sît de Atf – www.associazione-teatralefriulana.com – si puedin cjatâ dutis lis informazions e il regolament dal concors e de racuelte straordenarie “No smenteâ!”.
Monika Pascolo
