Al à non “Ator pal Friûl” e al è il gnûf zûc educatîf in lenghe furlane, realizât di Ubiz3D srls, e finanziât de ARLeF-Agjenzie regjonâl pe lenghe furlane, te suaze dal Bant pal supuart aes ativitâts che a àn tant che obietîf chel di promovi la lenghe furlane tal setôr de Editorie. Il videozûc al è disponibil online tal sît atorpalfriul.it dopo trê agns di lavôr e un test finâl, che al à impegnât cinc classis de scuele primarie “Guglielmo Marconi” e de scuele secondarie di prin grât “Ugo Pellis” di Cjasteons di Strade, par un totâl di 62 arlêfs.
Al è un progjet indreçât in particolâr ai fruts des classis 3e, 4e e 5e de scuele primarie, ma ancje a chei plui grancj che a frecuentin za la secondarie di prin grât. Un imprest che si integre ad implen cun “Anìn!”, il prin manuâl pensât par acompagnâ i students de scuele primarie a scuvierzi il furlan, lis peculiaritâts dal teritori, la sô storie e la sô culture.
«O mantignìn la nestre atenzion pontade sui plui piçui – al à sclarît il president de ARLeF, Eros Cisilino –. Par chest, cuant che nus è rivade cheste propueste di progjet, nus à parût une integrazion ideâl pes ativitâts didatichis za inviadis de ARLeF. “Ator pal Friûl” al è disponibil par ducj online e al è pensât sedi par jessi doprât in famee che intun contest didatic. Di fat, al ufrìs tantis ideis interessantis che i insegnants a podaran aprofondî cu lis lezions frontâls, in aule. Ce che si à di marcâ, però, al è che si trate ancje di une biele oportunitât par passâ il timp in famee, cui fîs, in maniere legre, zuiant e imparant il furlan, salacor tornant a scuvierzi peraulis o mûts di dî pôc cognossûts».
Zuiâ al è facil. Al baste jentrâ tal sît atorpalfriul.it, sielzi un non utent, une password e tacâ a esplorâ. I zuiadôrs a podaran visitâ in maniere virtuâl une schirie di lûcs dal Friûl, in particolâr, cuatri citadinis: Vençon, Palme, il Borc Cjistiel di Gurize e Cividât. Midiant di 25 minizûcs e di diviers ponts di interès, si podaran imparâ tancj contignûts in lenghe furlane di meti adun intun libri virtuâl speciâl, dulà che lis pagjinis a permetaran di viodi ce che al è stât cjapât sù e il stât di avanzament tal serious game, o zûc educatîf. I zuiadôrs a puedin otignî fintremai 41 ricognossiments virtuâi che a vegnin dâts se si puartin insom obietîfs specifics. I piçui a impararan cussì liendis (adiriture 21), detulis (24) e ancje peraulis particolârs o che aromai si doprin pôc (58), judâts di vuidis speciâls (14 in dut), tant che Pauli Diacun, Jacum Linùs, Ippolito Nievo, Lucine Savorgnane, Catarine Percude e pre Carli Dorligh, che al à ispirât il progjet. Cun lôr, a compagnâ il zuiadôr a saran ancje figuris magjichis tant che lis Aganis o i Sbilfs, o il Tiliment, dulà che si podarà fâ un rafting virtuâl. A son personaçs che, in part, i plui piçui a àn za cognossût propit cun “Anìn!”.
«O sin pardabon braurôs di “Ator pal Friûl” – e à declarât Elisa Buttussi, responsabile dal progjet e aministradore delegade di Ubiz3D, ringraciant la ARLeF pal supuart –. Al è stât un lavôr une vore impegnatîf, ma tal stes timp ancje tant stimolant, che al à cjapât dentri nûf colaboradôrs e tra chescj progjetiscj e svilupadôrs, artiscj 3D, creadôrs di contignûts, esperts tal progjetâ la esperience dal zuiadôr, progjetiscj dal sun e realizadôrs di videos. Al è un progjet une vore impuartant par nô parcè che al è nassût par ricuardâ Carli Dorligh, predi e insegnant di religjon, lenghe, storie e culture furlane. Par plui di 40 agns al è stât un pont di riferiment pe comunitât di Midiuze, ma ancje par chês dongje. Une part dal nestri grup lu ricuarde cun afiet e par chest o vin sielzût di zontâlu tra lis figuris vuide dal zûc educatîf».
