Il taramot nol varà nancje rispiet pal timp di chê sfortunade Vierte di Mai compagnant, cuasi cuntun sarcasmi soradin, cjalt e frêt, ploie e soreli, par tibiâ ancjemò di plui lis tendis e la puare int che e stave sot. Ae fin dal mês a mancjavin ancjemò tendis, chês che a jerin no ufrivin un ripâr adat.
Il “Bollettino di collegamento delle tendopoli” al publicave une letare dulà che i responsabii dal cjamp Simonetti a denunziavin che, no jessint ancjemò rivadis lis 50 tendis che a jerin stadis prometudis, daspò de burascje dai 27 di Mai, a vevin scugnût rangjâsi di bessôi, parcè che no jerin rivâts nancje a vê dal Comun un rodul di nylon par cuvierzi lis tendis, che chei a disposizion a jerin stâts doprâts par cuvierzi lis oparis di art.
No dome a mancjavin lis tendis, ma chês che a jerin stadis metudis sù no jerin buinis par protezi chê umanitât strache, avilide, ma massime chês personis che a jerin maladis, i anzians e i frutins.
E il stes vivi al veve procurât, a plui di cualchidun, malans di curâ. Parsore dal taulin de stanzie dulà che o vevi “l’ufici”, si ingrumave la tasse dai certificâts che l’Uficiâl sanitari al jemplave par declarâ che la persone titolâr no podeve plui stâ sot di une tende.
A jerin rivadis ancje ufiertis pe sistemazion di viei e di fruts, e parfin cualchi richieste di adozion; ma i viei no volevin lâ vie, magari a vevin pôre di no tornâ plui, e lis fameis no intindevin di slontanâsi dai fîs. La situazion sanitarie e stave precipitant ancje parcè che il Comissari Zamberletti al veve decidût, in date ai 11 di Jugn, di declarâ la fin de emergjence e la normalizazion dal setôr sanitari. Il Comun di Glemone e l’Uficiâl sanitari a denunziarin cun fuarce che la situazion sanitarie no jere par nuie normalizade, e che al coventave continuâ cu la organizazion di prime.
E, in soreplui, dai ospedâi a vignivin dimetudis tantis personis che no podevin dal sigûr tornâ tes tendis. O vevi ancje fat un scjampon a Triest, par viodi se o rivavi a cjatâ une soluzion. L’Assessôr regjonâl mi ricevè tal so biel ufici e mi scoltà cun tante atenzion, e un pôc comovût. Ma cu la atenzion e la comozion no si distrighin i problemis.
Si pensà alore a une soluzion: chê des roulottes. Dacuardi, sindic e comitâts di tendopoli a publicarin un apel, ai 11 di Jugn, par domandâ la disponibilitât di roulottes a ents publics e privâts.
La rispueste, si pues capî il moment, no fo chê che si sperave. Nancje des ditis che a fasevin roulottes, che a lôr si jere domandât la pussibilitât di fitâ roulottes, e rivà une rispueste positive: a capivin il probleme, e se a vessin podût, lu varessin fat cul cûr, ma il cûr, in chel moment, al bateve par alc altri. Di stâ a spietâ no vevin nissune premure.
Nol restave altri che cirî di comprâlis, chês roulottes che si veve tante dibisugne. Mighe facil. O cjatai une spuinde tal vicesindic, che in chel moment al sostituive il sindic, e i presentai la mê idee, puartant daûr un biel macet dai certificâts dal Uficiâl sanitari: intun prin moment al tontonave, plui che altri parcè che al pensave che al sarès stât dificil rivâ fint insom, ma po mi disè: “Rangjiti!”. E cheste e fo la sô liberatorie.
Cun Sandra, che e puartave indenant il Servizi di assistence domiciliâr partît pôcs mês prime, e che ogni dì, ancje jê, mi recitave i grignei dal misteri dolorôs dal rosari di tante puare int, cul furgon dal Servizi o rivarin a Calenzano, dulà che si fasevin roulottes. Cundut che o vessin visât de nestre rivade, nus cjalavin un pôc sorprendûts. Forsit a vevin pensât che si tratàs di un scherç, ma nô o jerin li par cumbinâ.
E o cumbinarin un acuardi par cincuante roulottes di un o plui puescj, acuardi che po dopo o varessin metût a puest cuntune delibare de zonte comunâl.
E lis roulottes a scomençarin a rivâ. Sandra, che no i faseve pôre nancje il diaul, e veve fat tacâ daûr de sô 126 un ganç: cuant che une roulotte e rivave in stazion cul tren, jê e lave a cjolile par puartâle tun cjamp li che o vevin destinât, in spiete che la comission comunâl e decidès a cui assegnâlis.
Al jere il “cjamp des roulottes”.
Roberto Iacovissi
