25 mil euros destinâts ai ents locâi che a vuelin celebrâ il 3 di Avrîl
La Agjenzie Regjonâl pe Lenghe Furlane – ARLeF e sostignarà, cun 25 mil euros in totâl, i ents locâi che a vuelin realizâ events colaterâi ae Fieste de Patrie dal Friûl. Rivade ae edizion numar 44, la fieste e cole ai 3 di Avrîl e e ricuarde la date di costituzion dal Stât patriarcjâl furlan intal 1077. Chest an l’event principâl si davuelzarà ai 11 di Avrîl e al varà tant che sede principâl Udin.
A podaran acedi ai fonts i ents cun sede legâl intai teritori des ex provinciis di Gurize, Pordenon e Udin, e – pe prime volte – ancje i Comuns furlans dal Venit (Cint, Concuardie, Fossalte, Gruâr, Puart, San Michêl dal Tiliment, Tei) in graciis di un acuardi tra lis Regjons Friûl-V.J. e Venit dai 17 di Setembar stâts.
Daûr di ce che al previôt il bant, disponibil su www.arlef.it te sezion “Bants, garis e avîs 2021”, a saran finanziadis lis ativitâts che a vuelin valorizâ lis origjins, la culture e la storie di autonomie dal popul furlan. In particolâr: events di cualitât, di realizâ online, che a rivin a fâ partecipâ soredut lis gjenerazions plui zovinis e che a sedin indreçâts a fâ cognossi e/o aprofondî la lenghe, la storie e la culture furlane; ma ancje stampe e difusion di publicazions che a vedin il stes obietîf; infin realizazion e instalazion di lastris, targhis o insegnis turistichis cul fin di memoreâ personalitâts che a àn contribuît in maniere impuartante ae conservazion e al disvilup de identitât furlane.
Lis ativitâts culturâls a podaran jessi realizadis di un ent locâl singul o pûr di agregazions. Lis domandis a varan di rivâ, dentri dai 8 di Març dal 2021, dome midiant di PEC ae direzion: arlef@certgov.fvg.it.
Par dutis lis informazions sul al bant, si pues telefonâ al 0432 555910, o scrivi a: federica.delpino@regione.fvg.it
