I Gnognosaurs a imparin a svolâ: al rive in edicule «Tal blu piturât di blu», il gnûf album di colorâ

Al è rivât tes ediculis dal Friûl il secont album di colorâ dai Gnognosaurs, i simpatics dinosauruts dordei che a fevelin furlan e che a àn concuistât grancj e piçui dilunc des festivitâts di Nadâl cul lôr debut editoriâl. Il gnûf album, intitolât «Tal blu piturât di blu», al è publicât di La Vita Cattolica, il setemanâl de Diocesi di Udin, cul jutori de ARLeF ed al è stât pensât par compagnâ i fruts par dute la istât, tra colôrs, zûcs e storiis. Come che tal prin episodi, lis taulis di colorâ no son dome dissegns a sè: dutis adun a componin une storie complete, trasformant l’album intun fumet di colorâ di bessôi, pagjine dopo pagjine. Une formule che e veve za conquistât i letôrs dal prin numar.

Se tal prin volum la storie e faseve in mût di presentâ i varis personaçs dal mont dai Gnognosaurs, i protagoniscj di cheste seconde aventure a son il professôr Einsaur, strampalât sienziât dal Jurassic, e il so fidât assistent Blik. Cjalant il svol dai pterodatii, i doi a decidin di imitâju e si butin intune imprese dute di ridi e di colorâ.

I pterodatii a deventin ancje l’argoment de pagjine Educational, presinte in ogni album. Cheste volte i fruts a podaran scuvierzi il Preondactylus buffarinii, il rettil svolant che al viveve tal Triassic superiôr, cirche 228 milions di agns indaûr, e che al è stât cjatât tal Comun di Preon, in Friûl. Considerât il pterosauri plui primitîf e un dai plui antîcs mai scuvierzûts, il Preondatil al è un vêr tesaur paleontologjic locâl: un mût par fâ sintî i piçui letôrs braurôs dal teritori dulà che a vivin. L’album al è completât di zûcs, quiz e ativitâts pensadis par un Istât di divertiment, sot dal segn de creativitât e de lenghe furlane.

«Tal blu piturât di blu» al è disponibil tes ediculis dal Friûl e si pues comprâlu ancje online sul sît de La Vita Cattolica.