«Flame vive de sperance nestre»: cussì e recite la prime rie dal imni dal Jubileu “Pelegrins di sperance” voltât in lenghe Furlane e publicât ai 3 di Avrîl, aniversari de nassite dal Principât patriarcjâl e, vuê, Fieste de Patrie dal Friûl. E je la prime version dal imni dal Jubileu voltade intune lenghe minoritarie ricognossude dal Stât talian.
Il test al è stât voltât de bande dal Ufici liturgjic diocesan, cjolint l’origjinâl par talian di Pierangelo Sequeri. La musiche origjinâl e je di Francesco Meneghello. L’imni “Pelegrins di Sperance” al è cjantât dal Côr dai zovins dal Domo di Glemone, diret di Damiano Gurisatti, organist pre Aldo Castenetto salesian. Location recording e finalizazion audio di Andrea Peluso, par cure di Agherose. A ducj lôr il preseament e un sincîr ringraciament de bande de Arcidiocesi di Udin.
Il test dal imni
Flame vive de sperance nestre,
cheste cjante si alce viers di Te.
Grim de vite che par simpri e reste,
te fidance, o cjaminìn cun Te.
Ducj i popui, lenghis e gjernaziis
te Peraule tô la lûs a viodin.
Fîs e fiis, dispierdûts e debii,
tal amât to Fi che si ristorin.
Diu nus vuarde, plen di tenarece:
l’albe e criche de zornade gnove.
Gnûf il cîl, la tiere gnove cree:
al travierse i mûrs il Spirt de vite.
Alce i vôi, svole adalt cul aiar,
slungje il pas: tal timp Idiu si mostre,
tal so Fi, nassût te nestre forme,
ducj i umign la sô strade a cjatin.
