“Ad flendos tuos Aquilegia, cineres/ non mihi ullae sufficiunt lacrimae” (O Aquilee a vaî la tô cinise flevare, no ai la vôs, e puaris lis lagrimis): al scomence cussi il “Ritmi su lis maseriis di Aquilee”, che tancj studiôs a àn conferît al “nostran” patriarcje Paulin di Aquilee, il poemut che l’origjinâl al è conservât a Viene. Tra chescj, ancje il poete Giusoè Carducci, che tal mês di Març dal 1884 al veve tignût ai students de Universitât di Bologne lezions di Leterature racueltis tal saç “Dell’inno Resurrezione”, dulà che al concuardave cun chei che prime di lui a vevin conferît chest “Ritmi” al patriarcje Paulin di Aquilee. Tal so saç, il poete al operave une analisi puntiliose dal test dal imni manzonian (“La Resurrezione”), metintlu a confront cul test che tal secul VIII Paulin al veve scrit vaint su lis maseriis di Aquilee.
La poliedriche personalitât dal Patriarcje e veve colpît il poete, tant di puartâlu a indagâ su la poesie “barbare” (il tiermin al jere stât inventât propit dal Carducci cul proposit di aplicâ lis regulis de poesie greghe e latine classiche, che il lôr ritmi si basave su la cuantitât des silabis, no sui acents, come che al sucêt te lenghe taliane) di Paulin, cussì di meti il voli parfin sul parcè che il patriarcje al ves vût scrit chest “Ritmi”, e cjatant une rispueste avonde probabile te scorsonade dal popul dai Avars che tal 790, sîs agns prime di jessi stâts sconfits dal esercit carulin di Pipin, a vevin semenât distruzion e muart in dut il Patriarcjât, incagnintsi particolarmentri su la citât di Aquilee.
La ipotesi dal Carducci e podeve vê cualchi atrat parcè che il patriarcje al jere sorevivût a chê tremende scorsonade, ma al reste il fat che Paulin, tra lis resons di chê distruzion, nol ricuarde i Avars, ancje se al fevele di une invasion. La invasion descrite di Pauli, cun acents cumò flevars, cumò dramatics, e je chê dai Uns di Atile, rindude in maniere dramatiche te setime strofe, cul episodi dal svol dai uciei, che Atile al interprete come il sburt che i coventave par l’assedi finâl ae citât. L’imni al è il jevâsi pietôs dal lament dal poete su lis maseriis di Aquilee – un timp potente e siore citât – cumò colade in ruvine, dut costruît su la oposizion tra chel che al jere di splendit e di nobil un timp, e la contemporanie situazion di triste e miserevule realtât di une citât ridusude in ruvine e ricet di sarpints.
Ancje il storic Pio Paschini, tun saç su la Glesie di Aquilee, al veve indagât su la identitât e sul autôr dal “Ritmi”, notant che al veve di jessi un om di letaris ma ancje un teolic, e chest massime in riferiment a une strofe dal imni, dulà che l’autôr si lamente pe distruzion dai Codiçs de Scriture dai Paris. Cun di plui, il Paschini al scrupulave che il patriarcje al ves indiment la pussibilitât di ricostruî Aquilee, proponiment che secont il Paschini al sarès stât impussibil di realizâ. Un progjet dal gjenar, invezit, simpri secont chest autôr, al sarès stât pussibil cul patriarcje che al jere vignût dopo Paulin: Massenzi. Stant, di fat, a une letare che l’imperadôr Carli il Grant al veve scrit tal 811, dulà che si lei che Massenzi i veve domandât jutori par ripristinâ l’onôr di Aquilee, sdrumade dai Gôts, dai Avars e di altris popui barbars, chest al podarès jessi stât propit il dissen di Massenzi. Par dîle dute, intun codiç pierdût, un studiôs al veve cjatât doi componiments scrits tal stes metri: l’“Inno di Natale” cul non di Paulin, e une strofe dal “Ritmi” cul non di Pauli. Erôr dal copist: la man e jere la stesse!
Roberto Iacovissi
