Al scomençave a albeâ, daspò di chê gnot tremende che l’orcolat al veve fat sintî la sô fuarce rabiose. La int di Glemone, ben planc, si stave sveant di chel sium di pôre che le veve cjapade la sere prime; di chel sturniment avuâl a un stât di incussience.
Cumò, passade la pôre, i gnerfs a jerin tornâts a rezi, plui fuarts des scossis che a continuavin a fâ tremâ cjasis e tiere, cence un moment di recuie.
28Si scomençave a cjalâsi ator, come par sincerâsi l’un cun chel altri di jessi ancjemò vîfs, par fortune o par gracie di Diu, daspò di chel montafin. Ma ancje par decidi di lâ indenant, di cemût scomençâ chê prime zornade di passion.
Al coventave proviodi a chei che a jerin restâts sot des cjasis sdrumadis, a chei che a jerin stâts ferîts, socori chei che a vevin dibisugne. Al coventave dut, parcè che intun moment si jere stâts disprivâts di dut, fale che de vite.
A coventavin tendis, brandis e cuviertis, prime che une gnove gnot, che magari e sarès stade come chê di îr, e rivàs a abraçâ cul so sudari neri cjasis e oms.
La sere dai sîs di Mai, in Prefeture a Udin, il prefet Spaziante al veve ordenât 200 tendis, che a cualchidun i veve parût parfin masse, par vie che la television e veve dit che nol jere sucedût nuie di grivi, e che si podeve tornâ a durmî come prime… Lis tendis: lis tendis a coventavin, a coventavin lis brandis, a coventavin cuviertis, che chês primis seris di Mai a jerin ancjemò fredis. E tantis, che nissun al saveve tropis, e dulà che a saressin coventadis; e bisugnave ancje pensâ dulà metilis jù, a organizâ lis tendopolis sul teritori di Glemone, che nol jere facil. Ben planc lis tendis a rivavin, si scomençà a metilis sù e a organizâ la vite di chei che a vevin cjatât acet tes tendopolis. La organizazion che e veve di spartî lis tendis e fadiave a tignî dut sot control: a Dartigne, l’Esercit al jere rivât cun 200 tendis, ma pôc dopo lis veve puartadis vie par menâlis di une altre bande.
La Direzion de Assistence dal Ministeri dai Internis e veve inviât in presse 582 tendis, masse pocjis par dut il teritori dal Friûl taramotât. Cussì, a Glemone ai 20 di Mai no jerin ancjemò rivadis altris 300 tendis che a jerin stadis imprometudis.
E la int e spietave par dibant. La sole robe che si podeve fâ, ma a malincûr, e jere chê di visâ la int. Sul “Bollettino di coordinamento delle tendopoli”, il ciclostilât che o publicavin come sfuei di notiziis e di rapuart tra la popolazion e la Aministrazion comunâl, al comparì un comunicât dal Comun, dulà che si visave che lis tendis no jerin rivadis, ma che il Comissari Straordenari Zamberletti al veve sigurât di jessisi impegnât par fâ rivâ prime pussibil dutis lis tendis che a coventavin, e che, par tant, “La popolazione è pregata di avere pazienza e di evitare di rivolgersi al Comune per problemi relativi alle tende”.
Ma intant, bisugnave continuâ a contentâsi, magari fasint sù cun cuatri lens une baracute, o taponant un cuviert che nol jere plui, cuntun sfuei di nylon o magari cun cualchi box in lamieris. Rivadis lis tendis che a mancjavin, Glemone e jere deventade un paîs di taramots e di tendopolis. Cualchidun al jere rivât a fâsi meti la tende vicin dai rudinaçs di cjase. Come une vecjute, che il so ricuart lu ai cjatât tes cjartis di in chê volte, che o ai tignût di cont:
Anute, la vecje de pelegrine nere, in zenoli e vai. / Denant / dal lavadôr un grum di modons / al caligo di Mai / a zemin. / La plante dal basili, i savôrs / lis fueis verdis – un timp – dai gjeranis / pleadis / de fote mate dal orcul. / Anute, la vecje de pelegrine nere e cjale atente / la disperade simetrie dai claps. / Dilunc dal cîl perlin / di Mai / si jeve sù, blanchiç / un fum di muart.
Roberto Iacovissi
