Il timp al svolave sot des tendis, al rive il mês di Lui; a son benzà doi mês che la int e vîf cussì, e lis cjasis ancjemò no si viodin, ancje se il Ministri Cossiga, tal indoman dal taramot, par television, al veve imprometût “Dalle tende alle case”. Cuant che si à dibisugne, cemût no crodi a un Ministri de Republiche?
Ma, forsit, chê e jere dome une batude di circostance, o magari une promesse di ocasion, fate adore, masse adore. Ma ancje il cuotidian locâl al bateve il stes tast, scrivint che al sarès stât miôr di no fâ sù barachis, che se no lis cjasis a saressin stadis un sium lontan. Ma la int e veve dibisugne, se no di une gnove sistemazion, almancul di une cove plui adate. Parfin la nêf, come lis autoritâts, ai 28 di Lui e jere rivade a dâ un cuc ai taramotâts.
Nancje la flevare sperance de leç 17 su la riparazion des cjasis danezadis e veve tirât sù il morâl plui di tant, parcè che lis comissions che a vevin di verificâ i dams a jerin pocjis, e il lavôr al lave indenant masse plancut, cussì che il vescul Battisti, te omelie dai Sants Ermacore e Fortunât, al denunziave il ritart e la inciertece de situazion. Ai 10 di Lui, a Glemone, mans pietosis a gjavavin fûr des maseriis dôs vitimis: il cont al jere rivât a 879.
Lis barachis, cuant rivarano? Doman? La date e sbrissave indenant simpri di plui. La inciertece e la confusion a paronavin lis autoritâts de Regjon, che no acetarin la ufierte di barachis di altris paîs taramotâts. “O fasìn di bessôi”: la Regjon e varès proviodût tun marilamp.
Ma intant, ai 10 di Lui, si viodin miârs di furlans che a van in pelegrinaç a Aquilee, la Glesie Mari, a preâ pai lôr muarts. Lis vôs di pre Checo e di Turoldo a fasevin trimâ la volte de basiliche cu lis lôr denunziis sui ritarts e su lis rispuestis mancjadis.
Il president de Zonte regjonâl, Antonio Comelli, al sigure, ma la int no crôt plui a di nissun e a nissune promesse. La 169me scosse dal sest grât e distude ogni sperance. La int e decît di protestâ, di fâ sintî lis sôs resons adalt.
Ai 10 di Mai, il Comitât di Coordenament des tendopolis al clame adun la int taramotade a Trasaghis, cun chest ordin dal dì: 1) organizazion de manifestazion dai 16 di Mai a Triest; 2) la plateforme rivendicative – che e sarà clamade “breâr dai svindics” – di presentâ in Regjon. Si da dongje, dopo tant timp, il Parlament de Patrie (taramotade) dal Friûl, ma no sot di un patriarcje forest o di Vignesie, ma secont il podê dal popul sovran. A son presints i rapresentants des tendopolis di tancj paîs, Sindics, Conseis comunâi e Sindicâts. E tante, tante int. Tal breâr si domande la partecipazion de int ae gjestion des mensis, un gnûf plan socioassistenziâl, la revision de leç 17 e la partecipazion popolâr ae ricostruzion.
Sul numar 16 dal “Bollettino di Coordinamento delle tendopoli” e je la int fruçade dal taramot a clamâ adun ducj i furlans, lis organizazions, i sindics ae manifestazion dai 16 di Lui.
Te zornade dai 16 di Lui, la citât di Triest e ven invadude di passe doi mil furlans, pe massime part feminis, fruts e viei; i triestins no àn mai viodût tancj furlans insiemi che a protestin, cui lôr cartei, e che a vuelin fâ sintî la lôr vôs: “Le parole non sono mattoni”, e je la uniche vôs dal corteu, che al va viers la sede de Regjon. I voi dai furlans e lis lôr musis a pandin la consapevolece di une dignitât riconcuistade.
Roberto Iacovissi
